آرمی چیف جنرل سید عاصم کی اعلی جرمنی فوجی و سول قیادت کے ساتھ ملاقاتیں، باہمی دلچسپی کے امور پر تبادلہ خیال

راولپنڈی (اُردو پوائنٹ اخبارتازہ ترین - اے پی پی۔ 23 مئی2024ء) پاک فوج کے سربراہ جنرل سید عاصم منیرسرکاری دورہ پر جرمنی پہنچ گئے، اعلی جرمنی فوجی و سول قیادت کے ساتھ ملاقاتیں کیں جس میں باہمی دلچسپی کے امور پر تبادلہ خیال کیا گیا۔ آئی ایس پی آر کے مطابق جرمنی وفاقی وزارت دفاع میں چیف آف ڈیفنس جنرل کارسٹن بریور نے آرمی چیف کا استقبال کیا۔

جرمن مسلح افواج کے دستے نے انھیں گارڈ آف آنر پیش کیا۔ آرمی چیف نے جرمن آرمی کے سربراہ لیفٹیننٹ جنرل الفونس ماس سے بھی ملاقات کی اور جرمن آرمی چیف کے ہمراہ آرمی کامبیٹ ٹریننگ سینٹر گارڈلیگن کا دورہ کیا۔ آرمی چیف کو سنٹر کے مختلف پہلوؤں اور جرمن فوج اور دیگر افواج کے دستوں کو دی جانے والی تربیت کے بارے میں بریفنگ دی گئی۔

(جاری ہے)

انہوں نے شہری جنگ پر ایک مظاہرہ بھی دیکھا اور مختلف تربیتی سہولیات کا دورہ کیا۔

آرمی چیف نے وفاقی چانسلر کے خارجہ پالیسی اور سلامتی کے مشیرجینزپلوٹنر، وزیر مملکت برائے امور خارجہ ٹوبیاس لنڈر اور نیل ہلمر، وزارت دفاع میں ریاستی سکریٹری نیل ہلمر سمیت دیگر سول اور عسکری قیادت سے ملاقاتیں کیں۔جرمن قیادت نے دہشت گردی کے خلاف جنگ اور خطے میں امن و استحکام برقرار رکھنے کے لیے پاک فوج کے کردارکی تعریف کی۔ آرمی چیف جرمن آرمڈ فورسز کمانڈ اینڈ سٹاف کالج، ہیمبرگ کا بھی دورہ کریں گے جہاں وہ مختلف ممالک سے کورس میں شرکت کرنے والے طلباء سے خطاب کریں گے تاکہ پاکستان کے علاقائی اور بین الاقوامی سلامتی کے تناظر اور اقوام متحدہ کے مشنز میں پاکستان کی مسلح افواج کے کردار پر روشنی ڈالیں۔