عمران خان نے اپنے قتل کا خدشہ ظاہر کیا تھا بات اسی طرف جاتی دکھائی دے رہی ہے،پی ٹی آئی

اسلام آباد(اردو پوائنٹ اخبارتازہ ترین۔24 مئی 2024 ) پاکستان تحریک انصاف کے رہنماﺅں کا کہنا ہے کہ بانی پی ٹی آئی نے اپنے قتل کا خدشہ ظاہر کیا تھا بات اسی طرف جاتی دکھائی دے رہی ہے،تمام ہتھکنڈے اپنا کر دیکھ لئے مگر ہمارے لیڈر کی طاقت دن بدن بڑھتی جارہی ہے، نہ یہ عمران خان کو مجبور کرسکے نہ ہی اس کی پارٹی کو، رات ہمارے سیکریٹریٹ پر نقب لگائے گئے۔

خیبرپختونخواہ ہاﺅس اسلام آباد میں سیکرٹری اطلاعات پی ٹی آئی رﺅف حسن نے دیگر پارٹی رہنماﺅں لطیف کھوسہ،شمیم نقوی اور علی محمد خان کے ہمراہ پریس کانفرنس کرتے ہوئے کہا کہ رات کو جو کچھ ہوا ان کی سزا ملنی چاہیے۔ احکامات کہیں اور سے آتے ہیں اور یہ لوگ ٹاوٹ ہیں۔ پورے اسلام آباد میں کوئی ایسی جگہ رہنے دیں جہاں ملک کی سب سے بڑی جماعت کیمرے کے سامنے بات کر سکے۔

(جاری ہے)

کل رات جو پی ٹی آئی سیکرٹریٹ پر حملہ ہوا وہ جمہوریت پر حملہ تھا۔یہ لوگ وزیراعظم کو نکالتے تھے اور لاتے تھے اس بار وہ نہیں ہوا تو انہوں نے 9 مئی کا ڈرامہ کیاگیا۔جب سیاسی جماعتوں کے دفاتر بند ہوں تو نان اسٹیٹ ایکٹرز کو موقع ملتا ہے، کل رات جو ہوا کیا تحریک انصاف کا نظریہ ایک بلڈنگ میں ہے؟ نظریہ تو سینے میں ہے بلڈنگ تو بس سر چھپانے کی جگہ ہے۔

روف حسن کا مزید کہنا تھا کہ ایک سال تک انہوں نے اپنا رویہ برقرار رکھا اور وقتاً فوقتاً اس میں شدت آتی رہی، الیکشن میں جس طرح سے عوام نے عمران خان کو ووٹ دیا وہ آپ کے سامنے ہے۔پریس کانفرنس سے خطاب کرتے ہوئے رہنماءپی ٹی آئی لطیف کھوسہ کا کہنا تھا کہ ہم عدلیہ کے ساتھ کھڑے ہیں، ہم دیکھتے ہیں کہ عدلیہ کو کون للکارتا ہے، آپ عدلیہ کی تضحیک کی بات کرتے ہو، ہم نہ صرف عدلیہ کے ساتھ کھڑے ہیں، ہم آئین کے ساتھ کھڑے ہیں، ہم آئین اور قانون کی پاسداری کو یقینی بنائیں گے، یہ بولیں تو لائیو دکھایاجاتا ہے ہمارا مطالبہ ہے کہ اب عمران خان کو بھی لائیو دکھایا جائے، اگر عمران خان کو ویڈیو لنک پر لاتے ہیں تو اس کو میوٹ کر دیتے ہیں، میں درخواست کرتا ہوں عدلیہ سے کہ عمران خان کو طلب کریں وہ ایک تاریخی خطاب ہوگا۔

یہ لوگ جو عدلیہ پر چڑھ دوڑ رہے ہیں ان کو انڈر پریشر کرنے کیلئے یہ کر رہے ہیں۔ سینیٹ میں دھواں دار تقریر کی گئی چیئرمین کیسے اجازت دے رہی ہے؟ باقاعدہ عدلیہ کو للکار رہے ہیں وہ اس قابل نہیں ہیں کہ ان کا نام لیا جائے۔ وہ 16 ماہ کہاں گئے جس میں تم نے عدلیہ کا مذاق اڑایا، آپ نے عدلیہ کی تضحیک اڑائی ہم پھر بھی آٹھ فروری کو الیکشن میں آئے، لوگ پی ٹی آئی کے امیدواروں کو ڈھونڈ رہے تھے، الیکشن سے ایک ہفتہ پہلے عمران خان کو تیب کیسز میں سزا سنائی گئی۔

190 ملین پاونڈ کہاں گیا؟ ووٹ کو عزت دو، آپ نے مینڈیٹ پر ڈاکا ڈالا ہے، اقتدار کی بندر بانٹ ہو رہی ہے؟ پی ٹی آئی رہنماءعلی محمد خان کا کہنا تھا کہ پی ٹی آئی وہ جماعت ہے جس نے پیغام دیا کہ سیاست مڈل کلاس لوگوں کا کام ہے، ہم نے وہ زمانہ بھی دیکھا جب پاکستان سے نوجوان بدظن ہو کر دیگر ممالک جارہے تھے۔ جب آپ سکول میں تھے تب عمران خان دنیا بھر میں پاکستان کا جھنڈا لے کر پھرتا تھا، افسوس یہ قوم کب تک اپنے لیڈرز کو بلی چڑھتے دیکھتی رہے گی، ہمارے ورکرز کے ساتھ کیا کیا نہیں ہوا، 80 سالہ ڈاکٹر یاسمین راشد جو کینسر کی مریضہ ہیں وہ بیڈ پر پڑی ہیں، آپ کیا سمجھتے ہیں کہ شہ رگ پر حملہ کرکے روف حسن کو ڈرایں گے، تو یہ نہیں ہوا۔

علی محمد خان نے کہا کہ امپورٹڈ وزیر داخلہ سے کہنا چاہتا ہوں کہ سیریز آف ایکشن ہم دیکھ رہے ہیں، آج بلڈنگ کے باہر زمین پر بیٹھ کر کور کمیٹی کا اجلاس کریں گے۔ مجھے بانی چیئرمین سے ملنے نہیں دیا جارہا ہے، وہ خود سپریم کورٹ جانا چاہتے تھے، ایک ایٹمی ریاست ایک سابق وزیر اعظم کو اڈیالہ سے سپریم کورٹ تک چالیس منٹ کے راستے کی سیکیورٹی نہیں دے سکتی۔ خیبر پختونخوا ہ ہاوس میں بیٹھے ہیں پختونوں نے قائد کا ساتھ دیا۔ سرمایہ کاری سہولت کانفرنس میں وزیر اعلیٰ خیبرپختونخوا ہ کو نہیں بلایا گیا اور نہ بلاکر آپ نے پشاور کو اسلام آباد سے کیا پیغام دیا؟