_ پاکستان میں منہ کا سرطان صحت کا سنگین مسئلہ ہے

کراچی (اُردو پوائنٹ اخبارتازہ ترین - آن لائن۔ 01 جون2024ء) پاکستان میں منہ کا سرطان یا کینسر صحت کا ایک سنگین مسئلہ ہے جبکہ کینسر کے علاج میں تاخیر اس مرض کے طاقتور ہونے کا سبب ہے، پاکستان دنیا کے اٴْن تین ممالک کی صف میں شامل ہے جہاں منہ کے سرطان سے متاثرہ افراد کی سب سے زیادہ تعداد ہے، ملک میں اس مرض کے پھیلنے کے اسباب میں پان، چھالیہ، گٹکا، نسوار، ماوا اور سگریٹ وغیرہ جیسی مضرِ صحت نشہ آور اشیاء کاکثیر استعمال شامل ہے۔

یہ بات ڈاو یونیورسٹی آف ہیلتھ سائینسز کراچی کے سرجن اور سابق ڈین فیکلٹی آف ڈینٹسٹری پروفیسر ڈاکٹرشاہ جہان کٹپرنے جمعہ کو ڈاکٹر پنجوانی سینٹر برائے مالیکیو لر میڈیسن اور ڈرگ ریسرچ (پی سی ایم ڈی)، جامعہ کراچی کے عوامی آگاہی پروگرام کے تحت’’منہ کے سرطان اور دانتوں کی صحت‘‘ کے موضوع پر ایل ای جے نیشنل سائینس انفارمیشن سینٹر کے لیکچر ہال میں منعقدہ ایک لیکچر کے دوران کہی۔

(جاری ہے)

لیکچر کا انعقادڈاکٹر پنجوانی سینٹر اور سندھ انوویشن، ریسرچ اینڈ ایجوکیشن نیٹ ورک (سائرن) کے باہمی تعاون سے ہو ا۔پروفیسرشاہ جہان کٹپر نے کہا کہ منہ کے سرطان کے علاج میں مرض کی فوری تشخیص بہت اہم مرحلہ ہے، منہ کا سرطان زبان، ہونٹ، مسوڑھوں اور رخسار سمیت منہ کے کسی بھی حصے کو متاثر کرسکتا ہے، مرض کی فوری تشخیص کے لیے کسی بھی فرد کے منہ اور گلے کا کلینکل معائنہ کیا جاتا ہے۔

دنیا میں منہ کے کینسر کے پھیلاو بہت زیادہ ہے،2020ء میں دنیا بھر میں3لاکھ77ہزار سے زیادہ کیسز رپورٹ ہوئے تھے۔ انھوں نے کہا پاکستان میں پان، چھالیہ، گٹکا، نسوار، ماوا اور سگریٹ وغیرہ جیسی مضرِ صحت نشہ آور اشیاء کے استعمال سے منہ کا کینسر پھیل رہا ہے، پاکستان میں منہ کے کینسر سے متاثرہ افراد کی بڑھتی ہوئی تعداد حکومت وقت سے یہ تقاضہ کرتی ہے کہ ملک میں منہ کے کینسر کے بہتر علاج معالجے کے لیے الگ سے اسپتال قائم کیے جائیں۔

اورل سب میو کوس فیبروس (او ایس ایف) کے متعلق بات کرتے ہوئے پروفیسر شاہ جہان کٹپر نے کہا کہ او ایس ایف ایک جان لیوا عارضہ ہے جس میں مریض کو منہ کھولنے میں سخت ناکامی کا سامنا ہوتاہے۔ انھوں کہا کہ منہ کے سرطان کی اہم علامات میں گردن میں گانٹھ، دانتوں کا ڈھیلا ہونا، سوجن یا ہونٹوں پر زخم جو ٹھیک نہیں ہوتے، نگلنے میں مشکل، بولنے میں تکلیف اور منہ زبان یا مسوڑھوں پر سرخ یا سفید دھبے یا وزن کا گھٹنا وغیر شامل ہیں۔ انھوں نے کہا کہ جن افراد کو ان علامات میں سے کسی ایک علامت بھی سامنا ہے تو وہ گھبرائے نہیں بلکہ فوری تشخیص کے لیے کسی متعلقہ سرجن سے رابطہ کرے کیونکہ فوری تشخیص اچھی تشخیص کا سبب ہوسکتی ہے۔#