مسلم کانفرنس تحریک آزادی کی علمبردار ہے ،سردارعتیق احمدخان

کشمیر کے ماضی ،حال ،مستقبل کی تاریخ سے مسلم کانفرنس کا نام حذف نہیں کیاجاسکتا،سابق وزیراعظم آزاد کشمیر

بدھ 5 جون 2024 19:01

مظفرآباد/غازی آباد(اُردو پوائنٹ اخبارتازہ ترین - این این آئی۔ 05 جون2024ء) آل جموں وکشمیرمسلم کانفرنس کے صدر وسابق وزیراعظم سردارعتیق احمدخان نے کہا کہ مسلم کانفرنس تحریک آزادی کی علمبردار ہے اور کشمیر کے ماضی ،حال اور مستقبل کی تاریخ سے مسلم کانفرنس کا نام حذف نہیں کیاجاسکتا۔ان خیالات کااظہار صدرمسلم کانفرنس سردارعتیق احمدخان نے دھیرکوٹ میں سابق رکن اسمبلی اور سردار محمدعبدالقیوم خان کے چھوٹے بھائی سردار عبدالغفار خان کی برسی کی اختتامی دعائیہ تقریب سے خطاب کرتے ہوئے کیا۔

سردارعتیق احمدخان نے کہا کہ سردار عبدالغفار خان تحریک آزادی کے سپاہی اور مجاہد اول کے دست راست تھے۔ جنہوں نے آزادکشمیر میں جمہوری اقدار کی سربلندی اور عوامی مسائل کے حل کیلئے اپنا کردار ادا کیا۔

(جاری ہے)

انہوں نے کہا کہ مسلم کانفرنس کارکنوں کو عزت دی ہے کیونکہ کارکن ہی کسی جماعت کا سرمایہ ہوتے ہیں۔اب وقت آگیا ہے کہ مسلم کانفرنس کے کارکن مجاہد اول کے پیغام کو عام کریں اور اس خطے کو پاکستان کا بازوئے شمشیرزن بنانے میں اپنا کردار ادا کریں۔

انہوں نے کہا کہ مضبوط اور مستحکم پاکستان ہی کشمیر کی آزادی کاضامن ہوسکتا ہے۔ اور رپاکستان کی مخالفت کرنے والے حقیقت میں کشمیر کی آزادی نہیں چاہتے۔انہوں نے کہاکہ سردار عبدالغفار خان جیسے جرات مند اور دلیر سپاہی قوموں کا سرمایہ ہوتے ہیں۔برسی کی تین روزہ تقریبات منعقد کی گئیں جس میں دعائیہ تقریب ،قرآن خوانی کی گئی اور لنگرتقسیم گیا۔اس موقع پرسردارعبدالغفار خان کے صاحبزادے میجرریٹائرڈنصراللہ خان نے برسی کی تقریب میں شرکت کرنے والوں کاشکریہ ادا کیا۔