جہلم میں ٹریفک کے معمولات کو بہتر بنانے کے ممکنہ اقدامات کیے جا رہے ہیں جبکہ ٹریفک کے قوانین میں کوئی کوتاہی برداشت نہیں کی جائے گی۔ ڈی ایس پی ٹریفک زبیر اختر بھدر۔

طارق مجید کھوکھر جمعہ 7 جون 2024 17:46

جہلم (اُردو پوائنٹ اخبارتازہ ترین۔ 07 جون2024ء) جہلم میں ٹریفک کے معمولات کو بہتر بنانے کے ممکنہ اقدامات کیے جا رہے ہیں جبکہ ٹریفک کے قوانین میں کوئی کوتاہی برداشت نہیں کی جائے گی۔ ڈی ایس پی ٹریفک زبیر اختر بھدر۔ ان خیا لات کا اظہار انہوں نے آج ٹریفک پولیس کی کارکردگی کے بارے میں تفصیلات بتاتے ہوئے کیا ۔ انہوں نے کہا کہ پہلے ٹریفک سٹاف کم ہونے کی وجہ سے ٹریفک کے معمولات میں شہر میں پریشانی کا سامنا تھا ۔

لیکن ڈسٹرکٹ پولیس آفیسر ناصر محمود باجوہ کی کوششوں سے ہمیں ٹریفک سٹاف ملا جس سے شہر میں ٹریفک کے معمولات کو کافی حد تک بہتر کر لیا گیا ہے ۔ انہوں نے بتایا کہ چھ ماہ میں ہم نے 28644 چالان کیے ۔ جنمیں 8336 بغیر لائسنس ، 1434 قانون کی خلاف ورزی پر جبکہ 966 بغیر ہیلمٹ چالان کیے ۔

(جاری ہے)

جس سے مجموعی طور پر 1 کروڑ 13 لاکھ 50 ہزار 900 روپے جرمانے کی مد میں حکومت پنجاب کو حاصل ہوئے۔

انہوں نے کہا کہ لوگوں اور نوجوانوں کو لائسنس قانون اور میرٹ کے مطابق تمام قانونی کاروائی کے بعد جاری کیے جاتے ہیں جبکہ جہلم میں تقریباً روزانہ کی بنیاد پر 30 اور ماہانہ 900 لائسنس جاری ہوتے ہیں۔ جبکہ خدمت مرکز اور ٹریفک آفس کی لائسنس پرانچ میں کرپشن کا کوئی وجود نہیں کیونکہ میرے ساتھ ساتھ ڈسٹرکٹ پولیس آفیسر ناصر محمود باجوہ بھی اچانک ٹریفک آفس کا دورہ کرتے ہیں اور ٹریفک سٹاف پوری توجہ سے کام کر رہا ہے انہوں کے بتایا کہ پچھلے دنوں ٹریفک کے تمام سسٹم کو اپ گریڈ کیا جا رہا تھا جس کی وجہ سے لائسنس جاری نہیں ہوئے اور عوام کو دشواری کا سامنا کرنا پڑا ۔ اب اس اپ ڈیٹ سسٹم کو سمجھنے کے لیے ٹریفک سٹاف کو معمور کر دیا گیا ہے اور یہ مسئلہ بھی جلد حل ہو جائے گا۔