پاکستان کے دشمنوں کا مکمل خاتمہ کریں گے، وزیراعظم شہباز شریف

شہدا نے ارض پاک کیلئے عظیم قربانیاں دی ہیں، شہید کی قربانی رائیگاں نہیں جائے گی، اللہ تعالیٰ خوش نصیبوں کو شہادت کا رتبہ عطا کرتا ہے،وزیراعظم کی شہید کیپٹن کے اہلخانہ سے ملاقات کے موقع پر گفتگو

فیصل علوی پیر 10 جون 2024 11:45

پاکستان کے دشمنوں کا مکمل خاتمہ کریں گے، وزیراعظم شہباز شریف

چونیاں(اردو پوائنٹ اخبارتازہ ترین۔10جون 2024 ) وزیراعظم شہباز شریف نے کہا ہے کہ پاکستان کے دشمنوں کا مکمل خاتمہ کریں گے ،شہدا نے ارض پاک کیلئے عظیم قربانیاں دی ہیں، شہید کی قربانی رائیگاں نہیں جائے گی، اللہ تعالیٰ خوش نصیبوں کو شہادت کا رتبہ عطا کرتا ہے۔وزیراعظم شہباز شریف نے شہیدکیپٹن فراز الیاس کی قبر پر پھول رکھے اور فاتحہ خوانی کی۔

وزیراعظم نے شہید کی والدہ اور اہلخانہ سے ملاقات کی اوراہلخانہ سے اظہارتعزیت کیا۔اس موقع پر گفتگو کرتے ہوئے ان کا کہنا تھا کہ قرآن گواہی دیتا ہے کہ شہدا زندہ ہیں۔کیپٹن فرازالیاس کا خون رائیگاں نہیں جائےگا۔ قرآن کریم میں ہے شہید کو مردہ مت کہووہ زندہ ہیں،پاک فوج کے شہدا نے ارض وطن کیلئے عظیم قربانیاں دیں۔وزیراعظم شہباز شریف نے اس موقع پر شہید کیپٹن فراز الیاس کے گاوں رائے کلاں کو ماڈل ویلیج بنانے کا اعلان کیا اور گاوں کا نام فراز الیاس شہید کے نام سے بھی منسوب کر دیا۔

(جاری ہے)

وزیراعظم نے شہید کیپٹن فراز الیاس کے گاوں کو ماڈل ویلج بنانے کی ہدایت کردی۔یاد رہے کہ خیبر پختونخوا ہ کے ضلع لکی مروت میں بارودی سرنگ دھماکے میں شہید جوانوں کی نماز جنازہ ادا کر دی گئی۔پاک فوج کے شعبہ تعلقات عامہ (آئی ایس پی آر) کے مطابق کیپٹن محمد فراز الیاس، صوبیدار میجر محمد نذیر، لانس نائیک محمد انور کی نماز جنازہ بنوں میں ادا کی گئی۔

لانس نائیک حسین علی، سپاہی اسد اللّٰہ، سپاہی منظور حسین اور سپاہی راشد محمود کی نماز جنازہ بھی ادا کر دی گئی۔بعد ازاں کیپٹن الیاس فراز کا جسد خاکی ان کے آبائی علاقے چونیاں پہنچایا گیا جہاں نماز جنازہ میں وزیر اعظم شہباز شریف، وفاقی وزرا، عسکری حکام، کور کمانڈر پشاور، حاضر سروس افسران، جوانوں اور عوام کی بڑی تعداد نے شرکت کی۔حملے میں شہید ہونے والے دیگر افسران اور جوانوں کے جسد خاکی ان کے آبائی علاقوں کی جانب روانہ کر دئیے گئے جہاں انہیں فوجی اعزاز کے ساتھ سپردِ خاک کر دیا گیا۔آئی ایس پی آر کے مطابق پاکستان کی سکیورٹی فورسز دہشتگردی کی لعنت ختم کرنے کیلئے پرعزم ہیں، بہادر شہدا کی یہ قربانیاں ہمارے عزم کو مزید تقویت دیتی ہیں۔