بطور وکٹ کیپر زیادہ ٹی ٹونٹی رنز، جوس بٹلر نے محمد رضوان کو پیچھے چھوڑ دیا

انگلش کپتان کا شمار دنیا کے بہترین ٹی ٹونٹی بلے بازوں میں ہوتا ہے

ذیشان مہتاب جمعہ 21 جون 2024 15:57

بطور وکٹ کیپر زیادہ ٹی ٹونٹی رنز، جوس بٹلر نے محمد رضوان کو پیچھے چھوڑ ..

باربڈوس (اردو پوائنٹ تازہ ترین اخبار۔ 21 جون 2024ء ) انگلینڈ کے کپتان جوس بٹلر نے جاری ٹی ٹونٹی ورلڈ کپ 2024 کے اپنے پہلے سپر 8 میچ میں ویسٹ انڈیز کو آٹھ وکٹوں سے شکست دینے کے ساتھ ساتھ پاکستان کے محمد رضوان کو بھی پیچھے چھوڑ دیا۔ جوس بٹلر نے ویسٹ انڈیز کے خلاف 22 گیندوں پر 25 رنز بنائے اور ایم ایس دھونی، محمد شہزاد اور کوئنٹن ڈی کاک کو پیچھے چھوڑ کر ٹی ٹوئنٹی میں سب سے زیادہ رنز بنانے والے وکٹ کیپر بلے باز بن گئے۔

ٹی ٹوئنٹی میں بطور وکٹ کیپر سب سے زیادہ رنز بنانے والے بیٹرز میں اب جوس بٹلر 2967 رنز کے ساتھ سرفہرست ہیں ، محمد رضوان 2952 کے ساتھ دوسرے، جنوبی افریقہ کے کوئنٹن ڈی کاک 2450 رنز بنا کر تیسرے ، افغانستان کے محمد شہزاد 2030 رنز کے ساتھ چوتھے جب کہ بھارت کے ایم ایس دھونی 1617 رنز بنا کر پانچویں نمبر پر ہیں ۔

(جاری ہے)

اس سے قبل 181 رنز کے ہدف کے تعاقب میں انگلینڈ نے 17.3 اوورز میں کامیابی حاصل کر لی۔

فل سالٹ اور جونی بیئرسٹو نے تیسری وکٹ کے لیے 44 گیندوں میں 97 ناقابل شکست رنز جوڑ کر انگلینڈ کو سپر 8 کے اپنے ابتدائی کھیل میں اہم جیت دلائی۔ سالٹ 47 گیندوں پر 87 رنز بنا کر ناٹ آؤٹ رہے جس میں سات چوکے اور پانچ چھکے شامل تھے۔ انہوں نے 16ویں اوور میں روماریو شیفرڈ کیخلاف 30 رنز بھی سکور کیے۔ بیئرسٹو نے بھی 26 گیندوں میں پانچ چوکوں اور دو زیادہ سے زیادہ چوکوں کی مدد سے 48 رنز کی اہم اننگز کھیلی۔ ویسٹ انڈیز کی جانب سے آندرے رسل اور روسٹن چیز نے ایک ایک وکٹ حاصل کی جنہیں ٹی ٹونٹی ورلڈ کپ 2024ء کے دوران پہلی شکست کا سامنا کرنا پڑا۔