بھارتی ٹیم چیمپئنز ٹرافی کھیلنے پاکستان نہ آئی تو اس کی جگہ کونسی ٹیم ٹورنامنٹ میں شامل ہوگی؟

اگر بھارتی کرکٹ ٹیم پاکستان میں ہونیوالے ٹورنامنٹ میں شرکت نہیں کرتی ہے تو اسکی جگہ سری لنکا کو ایونٹ میں شامل کیا جائیگا اور وہ روہت شرما کی ٹیم کی جگہ لے گی

ذیشان مہتاب منگل 16 جولائی 2024 14:56

بھارتی ٹیم چیمپئنز ٹرافی کھیلنے پاکستان نہ آئی تو اس کی جگہ کونسی ..

لاہور (اردو پوائنٹ تازہ ترین اخبار۔ 16 جولائی 2024ء ) چیمپئنز ٹرافی کے لیے بھارتی کرکٹ ٹیم اگر پاکستان نہیں آتی ہے تو پھر آئی سی سی کو دوسرے آپشنز کو استعمال کرنا پڑیگا۔ پاکستان آئندہ سال فروری 2025ء میں چیمپئنز ٹرافی کے شوپیس ایونٹ کی میزبانی کے لیے مکمل طور پر تیار ہے، میزبان کے علاوہ ون ڈے کی ٹاپ سات ٹیمیں آئی سی سی ٹورنامنٹ میں شرکت کریں گی، تاہم اب تک بھارتی ٹیم نے چیمپئنز ٹرافی میں اپنی شرکت کنفرم نہیں کی ہے۔

اگر بھارتی کرکٹ ٹیم پاکستان میں ہونے والے ٹورنامنٹ میں شرکت نہیں کرتی ہے تو پھر اس کی جگہ سری لنکا کو ایونٹ میں شامل کیا جائے گا اور وہ روہت شرما کی ٹیم کی جگہ لے گی۔ 2002ء کی چیمپئن سائیڈ 2023ء ون ڈے ورلڈ کپ کے پوائنٹس ٹیبل کے گروپ مرحلے میں 9ویں نمبر پر تھی جس کی وجہ سے وہ چیمپئنز ٹرافی کی ٹیموں میں جگہ نہیں بنا پائی، یہ پہلا موقع ہے کہ سری لنکا ٹورنامنٹ کے لیے کوالیفائی نہیں کر پائی۔

(جاری ہے)

ممکنہ طور پر بی سی سی آئی انٹرنیشنل کرکٹ کونسل سے اس ٹورنامنٹ کو سری لنکا یا یو اے ای منعقد کرنے کی درخواست کرسکتا ہے جیسا کہ ایشیا کپ 2023ء ایڈیشن کے لیے تجویز کیا گیا تھا۔ تاہم، ایشین کرکٹ کونسل نے پاکستان اور سری لنکا کے ساتھ مشترکہ طور پر ٹورنامنٹ کی میزبانی کرنے والے ایک ہائبرڈ ماڈل کو قبول کیا تھا، تاہم چیمپئنز ٹرافی کے تناظر میں ایسا ہونا مشکل ہے۔

خیال رہے کہ دو روز قبل بھارتی میڈیا نے دعویٰ کیا تھا کہ بھارتی ٹیم چیمپئنز ٹرافی کے میچز کھیلنے کے لیے پاکستان نہیں جائے گی اور ایونٹ ہائبرڈ ماڈل کے تحت ہوگا۔ ان خبروں کے سامنے آنے کے بعد بھارتی کرکٹ بورڈ نے چیمپئنز ٹرافی کے لیے پاکستان کا دورہ نہ کرنے کی خبروں کی تردید کرتے ہوئے کہا تھا کہ اس کا فیصلہ ان کی حکومت کو کرنا ہے۔ بی سی سی آئی کے نائب صدر راجیو شکلا کا کہنا تھا کہ بورڈ نے چیمپئنز ٹرافی کے حوالے سے اب تک کوئی آفیشل بیان جاری نہیں کیا ہے، ہمیں نہیں معلوم میڈیا میں یہ خبر کس نے دی ہے، انھوں نے کہا تھا کہ پاکستان میں ہونے والے ایونٹ میں بھارتی ٹیم کی شرکت کا فیصلہ بھارتی حکومت کرے گی۔

اس بار آئی سی سی چیمپئنز ٹرافی کی میزبانی پاکستان کے پاس ہے اور چیمئنز ٹرافی فروری ،مارچ 2025ء میں شیڈول ہے، پاکستان نے آئی سی سی سے چیمپئنز ٹرافی کا شیڈول بھی شیئر کردیا ہے جس کے مطابق بھارت کے تمام میچز لاہور کے قذافی سٹیڈیم میں رکھے گئے ہیں۔