وزیر دفاع سے برازیلین نیول چیف کی ملاقات،علاقائی صورت حال اور دوطرفہ تعاون پرتبادلہ خیال

منگل 23 جولائی 2024 22:41

اسلام آباد(اُردو پوائنٹ اخبارتازہ ترین - آن لائن۔ 23 جولائی2024ء) وزیر دفاع خواجہ آصف سے برازیل کی مسلح افواج کے چیف آف نیول اسٹاف ایڈمرل آندرے لوئیز سلوا لیما ڈی سانتانا مینڈس نے ملاقات کی ہے جس میں علاقائی صورتحال اور دوطرفہ تعاون سے متعلق امور پر تبادلہ خیال کیا گیا۔وزیر دفاع نے کہا کہ پاکستان برازیل کے ساتھ اپنے تعلقات کو بہت اہمیت دیتا ہے اور تمام شعبوں میں تعاون کو وسعت دینے کا خواہاں ہے۔

(جاری ہے)

خطے میں پاکستان کے کردار اور پڑوسی ممالک کے ساتھ تعلقات پر روشنی ڈالتے ہوئے وفاقی وزیر نے خطے میں امن و استحکام کے حصول کے لیے پاکستان کی کوششوں پر روشنی ڈالی۔ دونوں رہنماؤں نے دفاعی تعاون کو بڑھانے اور متنوع بنانے پر تبادلہ خیال کیا جس کے لیے دونوں ممالک کے درمیان کافی امکانات موجود ہیں۔ دونوں فریقین نے مفاہمت کی یادداشت کے ذریعے دفاعی تعاون کو ادارہ جاتی بنانے پر بھی اتفاق کیا۔ مزید یہ کہ ایک دوسرے کے تربیتی اداروں میں ٹرینیز کے باقاعدہ تبادلے پر بھی بات ہوئی۔