اورنج لائن ٹرین کا روایتی روپ بدلنے کا فیصلہ، ٹرینیں اب مختلف رنگوں کے اشتہارات سے سجیں گی

کمپنیوں پر اورنج رنگ برقرار رکھنے کی کوئی شرط نہیں ہوگی، برانڈز اپنے مخصوص کلر تھیم، تصاویر اور فیچرز کے مطابق پوری ٹرین کو سجا سکیں گے، یہ فیصلہ ریونیو میں اضافے کے لیے کیا گیا

ساجد علی بدھ 6 مئی 2026 12:53

اورنج لائن ٹرین کا روایتی روپ بدلنے کا فیصلہ، ٹرینیں اب مختلف رنگوں ..

لاہور (اُردو پوائنٹ اخبارتازہ ترین۔ 06 مئی2026ء) لاہور کی پہچان اورنج لائن میٹرو ٹرین اب اپنے روایتی رنگ کے علاوہ رنگ برنگے تجارتی اشتہارات میں رنگی نظر آئے گی کیوں کہ پنجاب ماس ٹرانزٹ اتھارٹی نے ریونیو میں اضافے کے لیے ٹرین کی باڈی اور اندرونی حصے کو برانڈنگ کے لیے کھولنے کا فیصلہ کرلیا۔ میڈیا رپورٹس کے مطابق پنجاب ماس ٹرانزٹ اتھارٹی نے اورنج لائن میٹرو ٹرین کو مالی طور پر خود مختار بنانے کے لیے ایک اہم قدم اٹھاتے ہوئے ٹرینوں پر قومی اور بین الاقوامی برانڈز کو برانڈنگ کی اجازت دے دی ہے، اس فیصلے کے بعد اب اورنج ٹرین صرف 'اورنج' نہیں رہے گی بلکہ مختلف کمپنیوں کے رنگوں اور لوگوز میں نظر آئے گی۔

بتایا گیا ہے کہ پنجاب ماس ٹرانزٹ اتھارٹی نے اشتہارات کے لیے وسیع تر گنجائش فراہم کی ہے، جس کے تحت اب ٹرین کی بیرونی باڈی، سیٹوں کے نیچے اور درمیان میں لگی شیٹس پر بھی برانڈنگ کی جا سکے گی، کمپنیوں پر اورنج رنگ برقرار رکھنے کی کوئی شرط نہیں ہوگی، برانڈز اپنے مخصوص کلر تھیم، تصاویر اور فیچرز کے مطابق پوری ٹرین کو سجا سکیں گے۔

(جاری ہے)

معلوم ہوا ہے کہ اتھارٹی نے بڑے برانڈز کو اس حوالے سے پیشکشیں جاری کر دی ہیں، ابتدائی طور پر ایک معروف موبائل کمپنی نے ٹرین کی مکمل برانڈنگ حاصل کرلی ہے، اس کمپنی کی جانب سے ٹرین کی باڈی اور اندرونی حصوں (بشمول انڈر سیٹس) کو اپنے برانڈ کے رنگوں سے سجا دیا گیا ہے، جو جلد ٹریک پر دوڑتی نظر آئے گی اور لاہور کے شہری اب جلد ہی اسٹیشنز پر اپنی پسندیدہ اورنج ٹرین کو مختلف برانڈز کے دیدہ زیب رنگوں میں دیکھیں گے۔

خیال رہے کہ اس سے قبل صرف اورنج لائن کے اسٹیشنز پر اشتہارات (Advertising) کی اجازت تھی، تاہم اب ٹرینوں کو متحرک اشتہاری بورڈز کے طور پر استعمال کیا جائے گا، اس اقدام کا بنیادی مقصد ٹرین کے آپریشنل اخراجات کو پورا کرنا اور حکومتی سبسڈی پر بوجھ کم کرنا ہے۔