پیر سے منگل کے دوران کراچی میں گرج چمک کے ساتھ بارش کا امکان

ہفتہ 27 جولائی 2024 18:18

اسلام آباد (اُردو پوائنٹ اخبارتازہ ترین - این این آئی۔ 27 جولائی2024ء) طاقتور مون سون ہواؤں کا 28 جولائی کی رات سے سندھ میں داخل ہونے کا امکان ہے۔

(جاری ہے)

محکمہ موسمیات کے مطابق 28 جولائی کی شام سے 30جولائی تک سندھ کے مختلف شہروں میں بارش کا امکان ہے،اس دوران تھرپارکر، عمر کوٹ، بدین،سجاول اور دیگر مقامات پر گرج چمک کے ساتھ بارش متوقع ہے جبکہ 29 سے 30 جولائی کو کراچی، سکھر، لاڑکانہ، جیکب آباد اور دیگر مقامات پر بارش کا امکان ہے۔

محکمہ موسمیات کے مطابق کراچی میں اتوار اور پیر کو درجہ حرارت میں اضافے کا امکان ہے، اس دوران درجہ حرارت 34 سے 36 ڈگری سینٹی گریڈ ہوسکتا ہے جبکہ کراچی میں اتوار کو مطلع جزوی ابر آلود اور موسم مرطوب رہنے کا امکان ہے۔علاوہ ازیں کراچی میں (آج) اتوار کی شام یا رات میں بوندا باندی اور ہلکی بارش کا امکان ہے جبکہ پیر سے منگل کے دوران گرج چمک کے ساتھ بارش ہوسکتی ہے۔