Live Updates

پاکستان شاہینز نے دوسرے ون ڈے میں بنگلہ دیش اے کو 8 وکٹوں سے ہرادیا

منگل 6 اگست 2024 16:20

ڈارون (اُردو پوائنٹ اخبارتازہ ترین - اے پی پی۔ 06 اگست2024ء) پاکستان شاہینز نے بائولرز کی عمدہ بائولنگ کی بدولت ڈارون ٹور کے دوسرے ون ڈے کرکٹ میچ میں بنگلہ دیش اے کو 8 وکٹوں سے شکست دے دی۔اس سے قبل گرین شرٹس نے اتوار کو پہلے ون ڈے میں این ٹی سٹرائیک کو 4 وکٹوں سے ہرایا تھا۔منگل کو کھیلے گئے دوسرے ون ڈے میچ میں محمد حارث نے ٹاس جیت کر بنگلہ دیش اے کو بیٹنگ دی ۔

پاکستان شاہینز کے بولرز نے بنگلہ دیش اے کو 24.3 اوورز میں صرف78 رنز پر آؤٹ کردیا۔پاکستان شاہینز نے 79 رنز کا ہدف 17 اوورز میں 2 وکٹوں کے نقصان پر حاصل کرلیا۔پاکستانی بولرز کی عمدہ بولنگ نے بنگلہ دیش اے کو کسی بھی موقع پر سنبھلنے کا موقع نہیں دیا اور اس کی وکٹیں وقفے وقفے سے گرتی رہیں۔ پرویز حسین 19 رنز کے ساتھ ٹاپ سکورر رہے۔

(جاری ہے)

عمران جونیئر 3وکٹوں کے ساتھ سب سے کامیاب بولر رہے۔

این ٹی سٹرائیک کے خلاف عمدہ بولنگ کرنے والے جہانداد خان اور مبصر خان نے ایک مرتبہ پھر اچھی بولنگ کرتے ہوئے 2،2وکٹیں حاصل کیں۔ خرم شہزاد بھی 2 کھلاڑی آؤٹ کرنے میں کامیاب رہے۔ انہیں ون ڈے میچوں کے لیے ڈارون میں روک لیا گیا تھا ۔کپتان محمد حارث نے وکٹ کیپنگ میں 3 کیچز پکڑے ۔پاکستان شاہینز کی اننگز میں صاحبزادہ فرحان بغیر کوئی رن بنائے رپون مونڈل کی گیند پر آؤٹ ہوگئے جس کے بعد عبدالفصیح اور عثمان خان نےدوسری وکٹ کے لیے 48 رنز کا اضافہ کیا۔

عبدالفصیح 12 رنز بناکر مونڈل کی گیند پر آؤٹ ہوئے۔عثمان خان نے 5 چوکوں اور ایک چھکے کی مدد سے 39 رنز سکور کیے اور آؤٹ نہیں ہوئے۔طیب طاہر17 رنز بناکر ناٹ آؤٹ رہے۔پاکستان شاہینز اب ٹاپ اینڈ ٹی ٹونٹی سیریز میں حصہ لے گی جس میں اس کا پہلا میچ 10 اگست کو پرتھ سکارچرز سے ہوگا۔