بنگلہ دیشی فوج میں اکھاڑ پچھاڑ، حسینہ واجد کا قریبی جرنیل فارغ

میجر جنرل ضیاء الاحسن فارغ ‘میجر جنرل اے ایس ایم رضوان الرحمٰن کی بطور ڈائریکٹر جنرل این ٹی ایم سی تقرری

منگل 6 اگست 2024 22:50

بنگلہ دیشی فوج میں اکھاڑ پچھاڑ، حسینہ واجد کا قریبی جرنیل فارغ

ڈھاکہ (اُردو پوائنٹ اخبارتازہ ترین - این این آئی۔ 06 اگست2024ء) بنگلہ دیش کی وزیراعظم حسینہ واجد کے ملک سے فرار اور آرمی کے ٹیک اوور کئے جانے کے بعد بنگلہ دیشی فوج کے اعلیٰ عہدوں میں بھی اکھاڑ پچھاڑ کی گئی ہے، فوج نے حسینہ واجد کے قریبی جرنیل کو فارغ کردیا ہے۔

(جاری ہے)

منگل کو بنگلہ دیش کی انٹر سروسز پبلک ریلیشنز ڈائریکٹوریٹ (آئی ایس پی آر) نے ایک پریس ریلیز میں اطلاع دی کہ آرمی چیف نے بنگلہ دیشی فوج کے اعلیٰ عہدوں میں ردوبدل کرتے ہوئے میجر جنرل ضیاء الاحسن کو ملازمت سے فارغ کر دیا ہے۔

اس کے علاوہ لیفٹیننٹ جنرل محمد سیف عالم کو وزارت خارجہ، لیفٹیننٹ جنرل مجیب الرحمان کو جی او سی آرمی ٹریننگ اینڈ ڈاکٹرائن کمانڈ، لیفٹیننٹ جنرل احمد تبریز شمس چودھری کو کوارٹر ماسٹر جنرل آف آرمی، لیفٹیننٹ جنرل میزان الرحمان شمیم کوچیف آف آرمی جنرل سٹاف تعینات کردیا گیا ہے۔اسی طرح لیفٹیننٹ جنرل محمد شاہین الحق کمانڈنٹ این ڈی سی اور میجر جنرل اے ایس ایم رضوان الرحمٰن کی بطور ڈائریکٹر جنرل این ٹی ایم سی تقرری کی گئی ہے۔