خواتین حوصلہ کریں، اپنے لیڈر کو رہا کروانا ہی: عالیہ حمزہ

جب بھی تحریک کا آغاز ہو گا خواتین کا ساتھ چاہیے ہو گا‘ لاہور ہائی کورٹ میں میڈیا سے گفتگو

جمعرات 29 اگست 2024 17:02

خواتین حوصلہ کریں، اپنے لیڈر کو رہا کروانا ہی: عالیہ حمزہ

لاہور(اُردو پوائنٹ اخبارتازہ ترین - این این آئی۔ 29 اگست2024ء) پاکستان تحریکِ انصاف کی رہنما عالیہ حمزہ کا کہنا ہے کہ میری خواتین سے گزارش ہے کہ اب حوصلہ کریں، اب ہم نے اپنے لیڈر کو رہا کروانا ہے، جب بھی تحریک کا آغاز ہو گا خواتین کا ساتھ چاہیے ہو گا۔عالیہ حمزہ نے لاہور ہائی کورٹ میں میڈیا سے گفتگو کے دوران کہا ہے کہ میری اور میرے لیڈر کی کوشش پاکستان کی فلاح کے لیے ہے، آج کی خواتین مردوں سے زیادہ مضبوط ہیں، 16 مہینے سے میں گھر نہیں رہی، گھر سے باہر یا عدالتوں میں رہی ہوں، میرے لیڈر نے سکھایا ہے کہ مشکل سے مشکل حالات میں بھی گھبرانا نہیں۔

عالیہ حمزہ کا کہنا ہے کہ جس طرح ہمارے لیڈر کے ساتھ سلوک کیا جا رہا ہے وہ قابل مذمت ہے، سابق وزیرِ اعظم کو ان کی سہولتیں سے محروم کیا جا رہا ہے۔

(جاری ہے)

انہوں نے کہا کہ بانی پی ٹی آئی انڈر ٹرائل ہیں ایسے میں ان کو جیل میں نہیں رکھا جا سکتا۔عالیہ حمزہ نے کہا کہ آپ ہمارے نظریے کو ہماری سوچ کو قید نہیں کر سکتے، میں کسی ایک لمحے بھی نہیں گھبرائی، اب ایک ہی مقصد ہے کہ کس طرح اس ملک کو خوش حال پاکستان بنا سکتے ہیں، ایسا پاکستان جہاں احتجاج ہڑتالیں نہ ہوں، لوگوں کو ان کا حق ملے۔

ان کا کہنا ہے کہ میں این اے 118 کی مقروض ہوں، میرے حلقے کے لوگوں نے مجھے جتوایا، میں جلد اپنے حلقے میں جاؤں گی اور سب کا شکریہ ادا کروں گی۔عالیہ حمزہ نے یہ بھی کہا کہ لاہور میں جلسہ ہونے والا ہے، جب لاہور بدلتا ہے تو پورا پاکستان بدلتا ہے، جب مینار پاکستان پر جلسہ ہو گا تب یہ لوگ پہلے ہی اپنے گھر میں جا چکے ہوں گے۔