Live Updates

افغانستان اور نیوزی لینڈ کا واحد ٹیسٹ بغیرکوئی گیند پھینکے ختم

بھارتی ریاست نوائیڈا کے وجے سنگھ پھاٹک سپورٹس کمپلیکس میں بارش اور گیلی آؤٹ فیلڈ کی وجہ سے ٹاس تک نہ ہو سکا

ذیشان مہتاب جمعہ 13 ستمبر 2024 11:37

افغانستان اور نیوزی لینڈ کا واحد ٹیسٹ بغیرکوئی گیند پھینکے ختم

نوائیڈا (اردو پوائنٹ تازہ ترین اخبار ۔ 13 ستمبر2024ء ) افغانستان اور نیوزی لینڈ کی کرکٹ ٹیموں کے درمیان بھارت میں ہونے والا ٹیسٹ میچ بارش کی نذر ہو گیا۔بھارتی ریاست نوائیڈا کے وجے سنگھ پھاٹک اسپورٹس کمپلیکس میں شیڈول ٹیسٹ میچ میں بارش اور گیلی آؤٹ فیلڈ کی وجہ سے ٹاس تک نہ ہو سکا۔ ٹیسٹ میچ کے پہلے دو روز موسم ٹھیک ہونے اور سورج نکلے رہنے کے باوجود گیلی آؤٹ فیلڈ کی وجہ سے ٹاس نہ ہو سکا جس نے سٹاف کی جانب سے گراؤنڈ کی تیاریوں پر سوالات اٹھائے جب کہ باقی تین روز مسلسل بارش کی وجہ سے دونوں ٹیمیں میدان میں نہ اتر سکیں۔

میچ کے آخری روز امپائرز کی جانب سے گراؤنڈ کی انسپکشن بھی کی گئی تاہم گراؤنڈ میں جگہ جگہ پانی جمع ہونے اور آؤٹ فیلڈ گیلی ہونے کی وجہ سے میچ بغیر ٹاس کے ہی ختم کر دیا گیا۔

(جاری ہے)

افغان کرکٹ بورڈ کی جانب سے جاری بیان میں کہا گیا ہے کہ گریٹر نوئیڈا میں مسلسل بارش کی وجہ سے افغانستان اور نیوزی لینڈ کے درمیان ٹیسٹ میچ ختم کر دیا گیا ہے۔ خیال رہے کہ ٹیسٹ کرکٹ کی تاریخ میں 1890ء سے لیکر اب تک صرف 7 مرتبہ ایسا ہوا ہے کہ میچ بغیر ایک بھی گیند پھینکے ختم کر دیا گیا ہو، آخری مرتبہ ایسا 1998ء میں ہوا تھا اور وہ میچ بھی نیوزی لینڈ کا ہی تھا، بھارت اور نیوزی لینڈ کے درمیان ڈونیڈن میں ہونے والا میچ بارش کی وجہ سے ختم کر دیا گیا تھا۔