حکومت کی تمام ترامیم صرف فرد واحد کیلئے ہوتی ہیں

ہماری پلاننگ پوری ہے، یقین ہے ہمارا کوئی ممبر چھوڑ کر نہیں جائے گا، رؤف حسن

اتوار 15 ستمبر 2024 12:20

حکومت کی تمام ترامیم صرف فرد واحد کیلئے ہوتی ہیں

اسلام آباد(اُردو پوائنٹ اخبارتازہ ترین - این این آئی۔ 15 ستمبر2024ء) ترجمان پاکستان تحریک انصاف رؤف حسن نے کہا ہے کہ حکومت کی تمام ترامیم صرف فرد واحد کیلئے ہوتی ہیں۔ نجی ٹی وی پروگرام میں گفتگو کرتے ہوئے رؤف حسن کا کہنا تھا کہ سپریم کورٹ کے فیصلے کے بعد فائدہ جس کو بھی ہو ایک دو دن تک معلوم ہو جائے گا۔قومی اسمبلی میں آئینی ترمیم کے حوالے سے گفتگو کرتے ہوئے رؤف حسن نے کہا کہ ہمیں یقین ہے ہما را کوئی بھی پارٹی ممبر چھوڑ کر نہیں جائے گا،جو بھی فیصلہ آئے گا ہم قبول کریں گے مگر لڑیں گے نہیں، ہمیں اپنے اراکین سے متعلق کوئی خوف نہیں ہماری پلاننگ پوری ہے۔

ان کا کہنا تھا کہ سپریم کورٹ کا فیصلہ الیکشن کمیشن کے رویے پر ہمارے مؤقف کی تائید ہے، موجودہ حکومت کی تمام اصلاحات یا ترامیم صرف فرد واحد کیلئے ہو تی ہیں، حکومت کو ڈر ہے کہ اگر فائز عیسیٰ چلے گئے تو آزاد فیصلے آنے لگیں گے۔

(جاری ہے)

ترجمان تحریک انصاف نے کہا کہ مذاکرات کا ماحول بنے گا تو ہم بھی پیچھے ہٹیں گے، بانی پی ٹی آئی کہ وہ بیان گنیں جس میں انہوں نے مذاکرات کی بات کی، میں پارٹی میں ان لوگوں میں سے ہوں جو ہمیشہ مذاکرات کی بات کرتے ہیں ، پی ٹی آئی اور اسٹیبلشمنٹ کے درمیان فوری مذاکرات ہونے چاہیے، مذاکرات کا ماحول پیدا ہو رہا ہے اور جلد بریک تھرو ہو جائے گا۔

رؤف حسن کا مزید کہنا تھا کہ ہم کہتے ہیں کہ مینڈیٹ کو بحال کریں، آئینی ترمیم سے متعلق حکومت نے ہمیں اعتماد میں نہیں لیا، آئینی ترمیم لانے کا یہ وقت ہی نہیں ہے، مجھے پوری امید ہے کہ مولانا اپنے مؤقف پر قائم رہیں گے۔