عظمی بخاری کی فیک ویڈیو کیخلاف درخواست پر سماعت ،ڈی جی ایف آئی اے ذاتی حیثیت میں طلب

بدھ 18 ستمبر 2024 15:38

لاہور(اُردو پوائنٹ اخبارتازہ ترین - این این آئی۔ 18 ستمبر2024ء) لاہور ہائیکورٹ نے وزیر اطلاعات پنجاب عظمی بخاری کی فیک ویڈیو کے خلاف دائر درخواست پر سماعت کرتے ہوئے ڈی جی ایف آئی اے کو ذاتی حیثیت میں طلب کر تے ہوئے ریمارکس دئیے ہیں کہ کمپرومائزڈ سسٹم نہیں چلے گا۔چیف جسٹس لاہور ہائیکورٹ جسٹس مس عالیہ نیلم نے درخواست پر سماعت کی ۔ عدالت نے فلک جاوید کے والد کو الگ سے درخواست دائر کرنے کی ہدایت کرتے ہوئے کہا کہ آپ الگ سے درخواست دائر کریں اس میں اپنے تحفظات لکھیں ۔

دوران سماعت ڈپٹی اٹارنی جنرل اسد باجوہ نے ایف آئی اے کی رپورٹ پیش کی جس پر فاضل عالت نے سوالات اٹھا تے ہوئے کہا کہ آپ کی رپورٹ بتاتی ہے کہ آپ کے لوگ ان سیٹوں کے اہل نہیں ۔وفاقی حکومت کے وکیل نے کہا کہ گرفتار ملزم حیدر علی کا موبائل فرانزک کے لیے بھیجوا دیا گیا ہے۔

(جاری ہے)

ایف آئی اے کے وکیل نے کہا کہ متہ پولیس اسٹیشن نے ملزم حیدر کو گرفتار کیا۔

چیف جسٹس مس عالیہ نے کہا کہ آپ راہداری ریمانڈ مانگ رہے تھے لیکن آپ نے ملزم حیدر کو گرفتار ہی نہیں کیا،راہدری ریمانڈ اس وقت لیا جاتا ہے جب ملزم آپ کی کسٹڈی میں ہوتا،ملزم متہ پولیس اسٹیشن کے پاس ہے آپ راہداری ریمانڈ مانگ رہے ہیں۔ وفاقی حکومت کے وکیل نے کہا کہ ملزم کو گرفتار کرنے گئے تو ایس ایچ او متہ نے بتایا ضمانت ہوچکی ہے،ملزم نے اب لاہور کی سیشن کورٹ سے عبوری ضمانت کروالی ہے ۔

چیف جسٹس نے کہا کہ آپ لوگ اتنے سادہ ہیں ،پولیس نے بتایا کہ ضمانت ہوئی ہے تو آپ نے مان لیا،آپ کا زور اِدھر چلتا ہے ،پنجاب میں جس کو دل چاہا گرفتار کرلیا۔ وفاقی حکومت کے وکیل نے کہا کہ خیبر پختواہ پولیس ہمارے ساتھ تعاون نہیں کررہی۔چیف جسٹس مس عالیہ نے کہا کہ اس مقدمے میں جوڈیشل مجسٹریٹ نے ضمانت دی،آپ کی ایف آئی آر کا ملزم تھا آپ نے گرفتاری ڈالی نہیں پولیس نے پیش کروا کر کیسے جوڈیشل کروایا۔

آپ کی ایف آئی آر میں ضمانت جوڈیشل مجسٹریٹ نے کیسے منظور کی،آپ کا تفتیشی کہاں تھا ،متہ پولیس سے آپ نے اپنا ملزم کیوں نہیں لیا۔ابھی تو میں نے ایکس (ٹویٹر)پر لیگل بحث سننی تھی۔چیف جسٹس مس عالیہ نے کہا کہ آئندہ سماعت پر آپ کا سربراہ رپورٹ سمیت پیش ہو،یہ کمپرومائزڈ سسٹم نہیں چلے گا۔ عدالت نے سماعت 23 ستمبر تک ملتوی کردی ۔