بغداد میں راکٹ حملہ، امریکی افواج کے زیرِ استعمال فوجی مرکز کو نشانہ بنایا گیا

بغداد(اُردو پوائنٹ اخبارتازہ ترین - این این آئی۔ 01 اکتوبر2024ء) دو عراقی فوجی حکام نے منگل کو بتایاہے کہ بغداد کے بین الاقوامی ایئرپورٹ کے قریب امریکی افواج کی میزبانی کرنے والے ایک فوجی مرکز پر کم از کم دو کاتیوشا راکٹ داغے گئے۔غیرملکی خبررساں ادارے کے مطابق انہوں نے مزید کہا کہ فضائی دفاعی نظام نے راکٹوں کو روک دیا۔

(جاری ہے)

دو سکورٹی ذرائع نے بتایا کہ ابتدائی تحقیقات سے پتہ چلتا ہے کہ تین راکٹ فائر کیے گئے جن میں سے ایک عراقی انسدادِ دہشت گردی فورسز کے زیرِ استعمال عمارات کے قریب گرا جس سے چند گاڑیوں کو نقصان پہنچا اور آگ لگ گئی لیکن کوئی جانی نقصان نہیں ہوا۔

بغداد میں ایک امریکی سفارتی مرکز 11 ستمبر کو حملے کی زد میں آیا تھا لیکن جانی نقصان کی کوئی اطلاع نہیں ملی۔امریکی سفارت خانے کے ترجمان نے حملے پر تبصرہ کرنے کی درخواست کا فوری جواب نہیں دیا۔امریکہ اور ایران دونوں کا ایک غیر معمولی علاقائی شراکت دار عراق 2500 امریکی فوجیوں کی میزبانی کرتا ہے اور ایران کے حمایت یافتہ مسلح دھڑے بھی اس کی سکیورٹی فورسز سے منسلک ہیں۔غزہ کی جنگ شروع ہونے کے بعد سے عراق میں ایرانی حمایت یافتہ گروہ شرقِ اوسط میں امریکی فوجیوں پر متعدد حملے کر چکے ہیں۔