وزیر اعلیٰ مریم نواز شریف کا محفوظ پنجاب ویژن، ناجائز اسلحہ کے خاتمے کیلئے سخت کریک ڈاؤن جاری

رواں برس خصوصی مہم کے دوران ہزاروں کی تعداد میں خطرناک آتشی ہتھیار، گولیاں اور کارتوس برآمد‘ ترجمان پنجاب پولیس

پیر 7 اکتوبر 2024 22:53

لاہور (اُردو پوائنٹ اخبارتازہ ترین - این این آئی۔ 07 اکتوبر2024ء) وزیر اعلیٰ مریم نواز شریف کے محفوظ پنجاب ویژن کی تکمیل میں پنجاب پولیس کا ناجائز اسلحہ کے خاتمے کیلئے سخت کریک ڈاؤن جاری ہے اور پولیس ٹیمیں لاہور سمیت صوبے کے تمام اضلاع کو ناجائز اسلحہ سے پاک کرنے کیلئے شب وروز مصروف عمل ہیں۔ ترجمان پنجاب پولیس نے بتایا کہ رواں برس کے دوران خصوصی مہم میں ہزاروں کی تعداد میں خطرناک آتشی ہتھیار، گولیاں اور کارتوس برآمد کئے گئے ہیں، لاہور سمیت صوبہ بھر میں ملزمان کے قبضہ سے 1302 کلاشنکوف برآمد کی گئیں، 36461 پسٹل، 2768 بندوقیں، 2521 رائفلز، 603 ریوالور اور 02 لاکھ 62 ہزار 583 گولیاں اور کارتوس برآمد کیے گئے۔

اسی طرح صوبائی دارالحکومت میں ملزمان کے قبضے سے 118 کلاشنکوف، 7368 پسٹل، 519 رائفلز، 282 بندوقیں اور 64 ریوالور اور41 ہزار 597 گولیاں بھی ملزمان کے قبضے سے برآمد کی گئیں۔

(جاری ہے)

آئی جی پنجاب ڈاکٹر عثمان انور نے سوشل میڈیا پر اسلحہ کی تشہیر اور ہوائی فائرنگ میں ملوث ملزمان کے خلاف سخت قانونی کاروائی کی ہدایت دیتے ہوئے کہاکہ ٹک ٹاک ویڈیوز میں اسلحہ کی نمائش کرنے والے ملزمان کو بلا تفریق قانون کی گرفت میں لایا جائے۔

آئی جی پنجاب نے مزیدکہاکہ اسلحہ کے کاروبار میں ملوث ڈیلرز کے لائسنس اور سٹاک انسپکشن کا عمل باقاعدگی سے سر انجام دیا جائے، آر پی اوز، ڈی پی اوز ناجائز اسلحہ کے کریک ڈاؤن کی ہفتہ وار رپورٹس سنٹرل پولیس آفس بھجوائیں۔ آئی جی پنجاب ڈاکٹر عثمان انور نے کہاکہ ناجائز اسلحے کے خاتمے کیلئے ترجیحی کاروائیوں میں تیزی لائی جائے۔