بچیوں کا عالمی دن ‘پنجاب سوشل پروٹیکشن اتھارٹی کی وائس چیئرپرسن جہاں آرا وٹو نے زیور تعلیم پروگرام کی آگاہی مہم کا افتتاح کر دیا

جمعرات 10 اکتوبر 2024 20:32

قصور(اُردو پوائنٹ اخبارتازہ ترین - این این آئی۔ 10 اکتوبر2024ء) پنجاب سوشل پروٹیکشن اتھارٹی کی وائس چیئرپرسن جہاں آرا منظور وٹو نے بچیوں کے عالمی دن کے حوالے سے زیور تعلیم پروگرام کے تحت رجسٹریشن اور رقم کی شفاف منتقلی کیلئے آگاہی مہم کا افتتاح گورنمنٹ گرلز ہائی سکول حاجی فرید روڈ قصور میں کیا۔اس موقع پر ایڈیشنل ڈپٹی کمشنر جنرل عمر اویس ‘چیف ایگزیکٹو آفیسر ایجو کیشن اتھارٹی ملک انور ندیم ، یو این ویمن کی نمائندہ سدرہ ہمایوں اور PMIU‘اساتذہ ‘والدین و طالبات کی کثیر تعداد موجود تھی ۔

اس موقع پر وائس چیئر پرسن جہاں آرا ومنظور وٹو کا پرتپاک استقبال کیا گیا ۔ اس موقع پر پنجاب سوشل پروٹیکشن اتھارٹی کی وائس چیئر پرسن جہاں آراء منظور وٹو نے کہا کہ دو ہفتوں پر محیط اس آگاہی مہم کا مقصد کم شرح خواندگی کے حامل 17 اظلاع کے سرکاری سکولوں میں چھٹی سے دسویں جماعت تک پڑھنے والی زیادہ سے زیادہ طالبات کو 80فیصد حاضری برقرار رکھنے پر سہ ماہی بنیادوں پر3ہزار روپے کے وظائف دینا ہیں ۔

(جاری ہے)

اس مہم کے دوران 206 سکولوں میں کیمپ لگائے گئے ہیں جن میں دو ہفتے تک طالبات کی رجسٹریشن اور پہلے سے رجسٹر طالبات کے والدین کو شفاف طریقے سے بینک آف پنجاب کے نمائندگان کے ذریعے رقم فراہم کی جائے گی۔ اس مہم کا اہتمام پنجاب سوشل پروٹیکشن اتھارٹی اور سکول ایجوکیشن ڈیپارٹمنٹ کے باہمی اشتراک سے کیا گیا ہے۔ انہوں نے مزید کہا کہ بچیوں کی تعلیم کی راہ میں حائل رکاوٹوں کو دور کرنے کیلئے یہ پروگرام ترتیب دیا گیا ہے اس ضمن میں ہم محکمہ سکول ایجوکیشن سے درخواست کرتے ہیں کہ اس مہم کو کامیاب بنانے کیلئے ہر کیمپ کے ملحقہ علاقوں میں جا کر اس بات کو یقینی بنائیں کہ ہر رجسٹرڈ اور اہل طالبہ کے والدین رقم کی وصولی کیلئے سکول میں موجود کیمپ میں آئیں ۔

آخر میں انہوں نے انتظامیہ اور بینک آف پنجاب کی ٹیم کا شکریہ ادا کرتے ہوئے، سکول کی طالبات سے کہا کہ اس ملک کی سالمیت اور امن میں اپنا حصہ ڈالیں، اپنے کام کو اور سوچ کو تعمیری بنائیں، منفی اور ملک کیخلاف سوچ کی پیروی نہ کریں پاکستان ہے تو ہم سب ہیں۔