گن پوائنٹ پر 85لاکھ روپے چھیننے کی واردات کا ڈراپ سین

کاروباری شہری شیخ شاہد کا ڈرائیور شفیق ہی ملزم نکلا،گرفتار کر کے رقم برآمد کر لی گئی

جمعہ 11 اکتوبر 2024 15:56

گن پوائنٹ پر 85لاکھ روپے چھیننے کی واردات کا ڈراپ سین

لاہور (اُردو پوائنٹ اخبارتازہ ترین - این این آئی۔ 11 اکتوبر2024ء) صوبائی دارالحکومت میں لٹن روڈ کے علاقہ میں گن پوائنٹ پر 85لاکھ روپے چھیننے کی واردات کا ڈراپ سین ہو گیا ، کاروباری شہری شیخ شاہد کا ڈرائیور شفیق ہی ملزم نکلا جسے گرفتار کر کے رقم برآمد کر لی گئی ۔ انچارج انویسٹی گیشن لٹن روڈ عاطف ریاض نے بتایا کہ شیخ شاہد نے اپنے ڈرائیور شفیق اورگن مین کو کاروباری لین دین کی رقم85لاکھ روپے لینے کے لئے بھیجا تھا، ملزم شفیق رقم وصول کرنے کے بعد راستے میں گاڑی چھوڑ کر رقم لے کر فرار ہو گیا۔

ایس ایس پی انویسٹی گیشن محمد نوید نے اس بڑی واردات کا نوٹس لیا تھااور فوری طور پر ملزم کو گرفتار کرنے کا حکم دیا تھا۔ ملزم کو جدید ٹیکنالوجی سمیت ہیومین انٹیلی جنس کی مدد سے گرفتار کیا گیا۔

(جاری ہے)

انچارج انویسٹی گیشن تھانہ لٹن روڈ عاطف ریاض نے پولیس ٹیم کے ہمراہ کارروائی کر کے ملزم شفیق کو گرفتار کر کے 85 لاکھ رقم برآمد کر مدعی کے سپرد کردی۔انہوں نے کہا کہ ملزم اب پولیس کی گرفت میں ہیں مضبوط چالان مرتب کرکے قرار واقعی سزا دلوائی جائے گی ۔ ڈی آئی جی انویسٹی گیشن ذیشان اصغر نے کہا کہ عوام کے جان و مال کا تحفظ پولیس کی اولین ترجیح ہے۔ایس ایس پی انویسٹی گیشن محمد نوید کی طرف سے پولیس ٹیم کے نقد انعام اور تعریفی اسناد کا اعلان کیا گیا ہے ۔