این اے 231 میں دوبارہ گنتی پر ہنگامہ، پی پی امیدوار کیخلاف توہین عدالت کی درخواست دائر

پیر 14 اکتوبر 2024 21:50

کراچی(اُردو پوائنٹ اخبارتازہ ترین - این این آئی۔ 14 اکتوبر2024ء) شہر قائد کے حلقہ این اے 231 میں ووٹوں کی دوبارہ گنتی میں رکاوٹ ڈالنے، بیلٹ پیپر چوری کرنے اور جلانے کا واقعہ پر تحریک انصاف کے حمایت یافتہ آزاد امیدوار خالد محمود نے حکیم بلوچ اور دیگر کیخلاف توہین عدالت کی درخواست دائر کردی۔

(جاری ہے)

آزاد امیدوار کی جانب سے دائر درخواست میں موقف اپنایا گیا ہے کہ ووٹوں کی گنتی سے پہلے حکیم بلوچ اور پیپلز پارٹی کے کارکنوں نے ریجنل الیکشن کمیشن آفس پر حملہ کیا، پیپلز پارٹی کے کارکنوں نے وہاں موجود عملے اور دیگر کو مارپیٹ کا نشانہ بنایا۔

درخواست میں لکھا گیا ہے کہ پی پی کے کارکنوں نے بیلٹ پیپر کے بورے زبردستی چھینے اور ایک بیلٹ پیپر کا بورا جلا دیا جبکہ ایک اپنے ساتھ لے کر بھاگ گئے۔درخواست گزار نے موقف اختیار کیا کہ پیپلز پارٹی کے کارکنوں کی یہ حرکت توہین عدالت کے زمرے میں آتی ہے۔ حکیم بلوچ اور پیپلز پارٹی کے دیگر کارکنوں کیخلاف توہین عدالت کی کارروائی کی جائے۔واضح رہے کہ الیکشن ٹربیونل نے حلقے کے 4 پولنگ اسٹیشنز کی دوبارہ گنتی کا حکم دیا تھا۔