منی لانڈرنگ کیس،عدالت کا پرویز الٰہی کو آئندہ سماعت پر ہرصورت پیش ہونے کا حکم

مونس الٰہی کی بیرون ملک سے گرفتاری کے لیے ریڈ نوٹس انٹرنیشنل پولیس کو بھجوا دیا گیا‘تحریری حکمنامہ

منگل 29 اکتوبر 2024 17:22

منی لانڈرنگ کیس،عدالت کا پرویز الٰہی کو آئندہ سماعت پر ہرصورت پیش ہونے ..

لاہور (اُردو پوائنٹ اخبارتازہ ترین - این این آئی۔ 29 اکتوبر2024ء) عدالت نے منی لانڈرنگ کیس میں سابق وزیراعلی پنجاب چودھری پرویز الٰہی کو آئندہ سماعت پر ہر صورت پیش ہونے کا حکم دے دیا۔لاہور کی سپیشل سینٹرل عدالت کے جج تنویر احمد شیخ نے چودھری پرویز الٰہی اور ان کے صاحبزادے مونس الٰہی و دیگر کیخلاف منی لانڈرنگ کے مقدمے کی گزشتہ سماعت کا تحریری حکمنامہ جاری کردیا۔

عدالتی حکم میں لکھا گیا کہ مقدمہ میں نامزد ملزم چودھری مونس الٰہی کی بیرون ملک سے گرفتاری کے لیے ریڈ نوٹس انٹرنیشنل پولیس کو بھجوا دیا گیا، ایف آئی اے کے مطابق انٹرنیشنل پولیس کے پاس ریڈ نوٹس ریویو کے لیے موجود ہے۔عدالت نے رہنما تحریک انصاف پرویز الٰہی کو پانچ نومبر کو ہرصورت عدالت میں پیش ہونے کا حکم دے دیا جبکہ مونس الٰہی کے شریک ملزم ضیغم عباس کے ناقابل ضمانت وارنٹ گرفتاری جاری کردیئے۔

(جاری ہے)

عدالتی حکم میں لکھا گیا کہ ایف آئی اے نے مونس الہی سمیت 9اشتہاری ملزمان کی جائیدادیں قرقی کے دورانیہ میں اضافے کی استدعا کردی، عدالت نے مزید قرقی میں اضافے پر ایف آئی اے سے تفصیلی رپورٹ طلب کرلی، عدالت نے اسسٹنٹ ڈائریکٹر ایف آئی اے کو آئندہ سماعت پر ذاتی حیثیت میں طلب کرلیا جبکہ زارا الٰہی کی مستقل حاضری معافی کی درخواست منظور کرلی۔واضح رہے کہ وفاقی تحقیقاتی ایجنسی (ایف آئی ای)نے سابق وزیراعلی پنجاب چودھری پرویز الٰہی اور سابق وفاقی وزیر چودھری مونس الٰہی سمیت دیگر کے خلاف منی لانڈرنگ کا چالان جمع کروا رکھا ہے۔