ہانگ کانگ سپر سکسز؛ پاکستان سیمی فائنل میں پہنچ گیا

پاکستان کی مضبوط باؤلنگ اور فیلڈنگ کی کوششوں نے جنوبی افریقی ٹیم کو 88 رنز تک محدود کرنے میں مدد کی، اتوار کو پاکستان مقابلہ آسٹریلیا سے ہوگا

ذیشان مہتاب ہفتہ 2 نومبر 2024 11:38

ہانگ کانگ سپر سکسز؛ پاکستان سیمی فائنل میں پہنچ گیا

ہانگ کانگ (اردو پوائنٹ تازہ ترین اخبار ۔ 2 نومبر 2024ء ) ہانگ کانگ ورلڈ سپر سکسز ٹورنامنٹ میں پاکستان نے مسلسل تیسرا میچ جیت کر سیمی فائنل کیلئے کوالیفائی کرلیا۔ مونگ کوک میں کھیلے گئے میچ میں پاکستان نے دوسرے کواٹر فائنل میں جنوبی افریقہ کو 17 رنز سے شکست دیکر ایونٹ کے سیمی فائنل تک رسائی حاصل کی۔

(جاری ہے)

پاکستان نے پہلے بیٹنگ کرتے ہوئے مقررہ 6 اوورز میں 105 رنز بنائے، گرین شرٹس کی جانب سے کپتان فہیم اشرف اور آصف علی صفر پر پویلین لوٹے تاہم محمد اخلاق نے جارحانہ بلےباز کا مظاہرہ کرتے ہوئے 16 گیندوں پر 7 چھکوں اور 2 چوکوں کی مدد سے 52 رنز کی اننگز کھیلی، اسی طرح حسین طلعت 27 رنز بناکر ناٹ آؤٹ رہے۔

جنوبی افریقہ کی جانب سے ہدف کے تعاقب میں آغاز اچھا نہ رہا، کپتان جے جے اسٹمس 6 جبکہ جیکس سنیمن 5 رنز بناسکے، ایوان جونز نے 46 رنز کی مزاحمتی اننگز کھیلی تاہم ٹیم کو میچ جتوانے میں کامیاب نہ ہوسکے۔ خیال رہے کہ ایونٹ میں پاکستان نے روایتی حریف بھارت، متحدہ عرب امارات اور جنوبی افریقہ کی ٹیموں کو شکست دی۔