Live Updates

ویرات کوہلی کی ٹیسٹ کرکٹ کے بلے بازوں کی عالمی درجہ بندی میں مسلسل تنزلی کا سلسلہ برقرار، 8 درجے تنزلی کے بعد 22 ویں نمبر پر چلے گئے

بدھ 6 نومبر 2024 17:25

دبئی (اُردو پوائنٹ اخبارتازہ ترین - اے پی پی۔ 06 نومبر2024ء) انٹرنیشنل کرکٹ کونسل(آئی سی سی ) کی طرف سے جاری کردہ ٹیسٹ کرکٹ میں بیٹرز کی تازہ ترین عالمی رینکنگ میں سینئر بھارتی بلے باز ویرات کوہلی کی مسلسل تنزلی کا سلسلہ جاری ہے اور وہ 8 درجے تنزلی کے بعد 14 ویں سے 22 نمبر پر چلے گئے ہیں۔ ویرات کوہلی کو نیوزی لینڈ کے ہاتھوں اپنی سرزمین پر 0-3 کی عبرتناک شکست کے بعد اپنی آئی سی سی رینکنگ میں زبردست دھچکا لگاہے۔

آئی سی سی کی ٹیسٹ کرکٹ کی بلے بازوں کی تازہ ترین درجہ بندی میں کوہلی 8 درجے تنزلی کے بعد 22 ویں نمبر پر چلے گئے ہیں ۔ کوہلی نے نیوزی لینڈ کے خلاف 3 ٹیسٹ میچوں میں صرف 93 رنز بنائے اور اب وہ ٹیسٹ فارمیٹ میں آئی سی سی مردوں کے بلے بازوں کی درجہ بندی میں 14 ویں سے 22ویں نمبر پر چلے گئے ہیں۔

(جاری ہے)

ویرات کوہلی کو کیوی آف سپنرز نے ہوم ٹیسٹ سیریز کے دوران آڑے ہاتھوں لیا ۔

ویرات کوہلی اور کپتان روہت شرما دونوں ٹیسٹ سیریز میں ناکام رہے، جس کے نتیجے میں بھارت کی ٹیم کو اس کی سرزمین پر تاریخی وائٹ واش شکست کا سامنا کرنا پڑا۔ نیوزی لینڈ ٹیسٹ کرکٹ کی تاریخ کی پہلی ٹیم تھی جس نے بھارت کو گھر پر 0-3 سے شکست دی۔ٹیسٹ کرکٹ میں بلے بازوں کی درجہ بندی میں انگلینڈ کے جوروٹ پہلے،نیوزی لینڈ کے کین ولیم سن دوسرے اور انگلینڈ کے ہی ہیری بروک تیسرے نمبر پر موجود ہیں۔

بھارت کے یاشاسوی جیسوال ایک درجہ تنزلی کے بعد تیسرے سے چوتھے نمبر پر چلے گئے ہیں،آسٹریلیا اسٹیو سمتھ پانچویں نمبر پر برقرار ہیں، بھارت کے ریشبھ پنت پانچ درجے ترقی پاکر 11 ویں سے چھٹے نمبر پر پہنچ گئے ہیں جبکہ نیوزی لینڈ کے ڈئرل مچل کی 8 درجے ترقی ہوئی ہے اور وہ 15 ویں سے ساتویں نمبر پر پہنچ گئے ہیں۔آسٹریلیا کے عثمان خواجہ کی دو درجے تنزلی ہوئی ہے اور وہ آٹھویں نمبر پر جبکہ پاکستان کے سعود شکیل بھی دودرجے تنزلی کے بعد نویں نمبر پر چلے گئے ہیں، ان کے علاوہ آسٹریلیا کے مارنس لبوشین دو درجے تنزلی کے بعد دسویں نمبر پر چلے گئے ہیں۔

بھارتی کھلاڑیوں میں 16ویں نمبر پر موجود شبمن گل ٹاپ 20 کی فہرست میں واحد بھارتی بلے باز ہیں۔بھارتی کپتان روہت شرما جنہوں نے ویرات کوہلی کی طرح نیوزی لینڈ کے خلاف سیریز میں خراب کارکردگی کا مظاہرہ کیا تھا ، 2 درجے تنزلی کے بعد 26 ویں نمبر پر چلے گئے ہیں۔\932