پی ٹی آئی نے انتخابی نشان بلے کے کیس میں سپریم کورٹ میں کیوریٹیو پٹیشن دائر کر دی

ایڈووکیٹ اجمل غفار طور کی جانب سے دائر 32 صفحات پر مشتمل درخواست میں کہا گیا ہے کہ سماعت کے دوران حالات کی وجہ سے موجودہ درخواست ضروری ہے اور یہ انصاف کے اصول پر مبنی ہے

فیصل علوی بدھ 13 نومبر 2024 10:53

پی ٹی آئی نے انتخابی نشان بلے کے کیس میں سپریم کورٹ میں کیوریٹیو پٹیشن ..

اسلام آباد(اردوپوائنٹ اخبار تازہ ترین۔ 13نومبر 2024) پاکستان تحریک انصاف نے اپنے انتخابی نشان بلے کے کیس کی نظرثانی درخواست خارج ہونے کے بعد سپریم کورٹ میں کیوریٹیو پٹیشن دائر کردی، پی ٹی آئی کی جانب سے دائر کی گئی کیوریٹیو ریویو پٹیشن کا مقصد الیکشن کمیشن آف پاکستان کی جانب سے بلے کا نشان نہ دینے کے فیصلے سے متعلق 13 جنوری اور 21 اکتوبر کے فیصلے کو کالعدم قراردینے کی استدعا کی گئی ہے،ایڈووکیٹ اجمل غفار طور کی جانب سے دائر 32 صفحات پر مشتمل درخواست میں کہا گیا ہے کہ سماعت کے دوران حالات کی وجہ سے موجودہ درخواست ضروری ہے اور یہ انصاف کے اصول پر مبنی ہے۔

کیوریٹیو ریویو درخواست میں تحریک انصاف کی جانب سے کہا گیا ہے کہ اس درخواست میں بنیادی حقوق اور ان لوگوں کے انتخابی حقوق سے متعلق قوانین کی تشریح کے سلسلے میں عوامی اہمیت کے سوالات اٹھائے گئے ہیں جس میں سپریم کورٹ کے ماضی کے دونوں فیصلوں کی جانب توجہ مبذول کروائی گئی ہے۔

(جاری ہے)

درخواست میں موقف اختیار کیا گیا ہے کہ یہ فیصلہ نادانستہ طور پر دیا گیا ہے۔

درخواست 22 اگست کے مبارک احمد ثانی کیس پر منحصر ہے جس میں سپریم کورٹ نے اپنے سابقہ فیصلے کو تبدیل کیا تھا۔پاکستان تحریک انصاف کی جانب سے دائر کردہ درخواست میں درخواست میں 22 اگست کے مبارک احمد ثانی کیس کا بھی حوالہ دیا گیا ہے جہاں سپریم کورٹ نے اپنے سابقہ فیصلے میں تبدیلی کرتے ہوئے گزشتہ فیصلوں پر نظر ثانی کی مثال قائم کی تھی۔درخواست میں کہا گیا ہے کہ یہ فیصلہ غیر قانونی تھا، جس کا مطلب ہے کہ یہ کسی قانون یا قاعدے کی شرائط سے لاعلمی میں دیا گیا تھا، ایسے فیصلے کو ایک غلطی سمجھا جاسکتا ہے اور یہ پابند نہیں ہوسکتا ہے۔

درخواست میں یہ بھی کہا گیا ہے کہ کیوریٹیو پٹیشن سپریم کورٹ کے اپنے ہی مسترد شدہ نظر ثانی کے فیصلے پر دوبارہ نظر ثانی کرنے کی اجازت دیتی ہے۔خیال رہے کہ 21 اکتوبر کو سپریم کورٹ آف پاکستان کے سابق سابق چیف جسٹس قاضی فائز عیسیٰ کی سربراہی میں سپریم کورٹ نے بلے کے نشان کیس میں پی ٹی آئی کی 13 جنوری کے فیصلے پر نظر ثانی کی درخواست مسترد کردی تھی۔