علامہ اقبال اوپن یونیورسٹی میں نیشنل کریکولم کونسل کے تعاون سے نیشنل کریکولم سمٹ 2024 کا آغاز

اسلام آباد (اُردو پوائنٹ اخبارتازہ ترین - اے پی پی۔ 26 نومبر2024ء) وزارت وفاقی تعلیم و پیشہ ورانہ تربیت کے زیر اہتمام اور نیشنل کریکولم کونسل (این سی سی) کے تعاون سے نیشنل کریکولم سمٹ 2024 کا آغاز علامہ اقبال اوپن یونیورسٹی میں ہو گیا۔ سمٹ ملک کے تعلیمی نظام کو جدید بنانے کی کوششوں کا حصہ ہے جس میں ایس ایس سی اور ایچ ایس ایس سی سطح پر نئے نصاب، نئے مضامین اور نئے تعلیمی شعبے متعارف کرائے گئے ہیں۔

دو روزہ سمٹ 27 نومبر 2024 کو اختتام پذیر ہو گا جس میں شعبہ تعلیم کے اہم سٹیک ہولڈرز، پالیسی ساز، معلمین اور نصاب کے ماہرین شرکت کر رہے ہیں۔ سمٹ میں خصوصی خطابات اور پینل ڈسکشنز کا اہتمام کیا گیا ہے تاکہ پاکستان کے تعلیمی منظرنامے کے مستقبل کو تشکیل دیا جا سکے۔ منگل کو سمٹ کا آغاز وفاقی سیکرٹری وزارت وفاقی تعلیم و پیشہ ورانہ تربیت محی الدین احمد وانی کے خیرمقدمی خطاب سے ہوا۔

(جاری ہے)

انہوں نے نیشنل کریکولم کونسل کی خدمات کا اعتراف کیا اور تمام شرکاء کا شکریہ ادا کیا جنہوں نے اس دو روزہ ایونٹ میں بھرپور شرکت کی۔اپنے خطاب میں محی الدین احمد وانی نے وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال کی تجویز کردہ پاکستان کے تعلیمی نظام کے جامع جائزے کا ذکر کیا۔ سیکرٹری تعلیم نے کہا کہ وہ چھ ماہ کے اندر موجودہ سکیم آف سٹڈیز کا جائزہ لے کر اس میں ضروری تبدیلیاں کی ہیں اور سمٹ سے موصول ہونے والی تجاویز کو نصاب اصلاحات کا حصہ بنایا جائے گا۔

انہوں نے نصاب کو مسلسل متحرک اور جدید رکھنے کی ضرورت پر زور دیا تاکہ یہ تیز رفتار تبدیلی کے دور میں طلباء کی ضروریات سے ہم آہنگ ہو۔ این سی سی جوائنٹ ایجوکیشنل ایڈوائزر ڈاکٹر شفقت علی جنجوعہ نے سمٹ کے شرکا سے خطاب کرتے ہوئے پاکستان کے نصاب میں ہونے والی تازہ ترین تبدیلیوں پر روشنی ڈالی۔ انہوں نے کہا کہ نصاب کا جائزہ لیا گیا ہے اور ایس ایس سی اور ایچ ایس ایس سی سطح پر نئے نصاب متعارف کرائے گئے ہیں، نئے تعلیمی گروپ بھی شامل کئے گئے ہیں جس سے طلبا کو وسیع تر تعلیمی اور کیریئر کے مواقع ملیں گے۔

انہوں نے مزید کہا کہ نصاب کی اصلاحات ایک مسلسل عمل ہے جو وقت کے ساتھ ساتھ جاری رہتا ہے تاکہ یہ موجودہ دور کے چیلنجز سے ہم آہنگ ہو، ہم اس بات کو یقینی بنانے کے لیے پرعزم ہیں کہ ہمارا نصاب وقت کے ساتھ ترقی کرے تاکہ طلباء کو ایسی مہارتیں فراہم کی جا سکیں جو عالمی سطح پر کامیاب ہونے کے لیے ضروری ہیں۔ دو روزہ سمٹ کے دوران کئی اہم موضوعات نصاب میں مہارتوں اور آئی ٹی کا انضمام، تعلیمی اداروں میں انٹرپرینیورشپ اور مالیاتی خواندگی، تعلیم و تدریس کے عمل میں جدت، ماحولیاتی خواندگی اور نصاب میں سبز انقلاب، ٹیکنالوجی کے ذریعے تشخیص کا نیا طریقہ، سائبر سیکیورٹی اور ڈیجیٹل شہریت، تعلیم میں خلا کی سائنس کا انضمام، صحت مند ذہنیت کی پرورش پر پینل ڈسکشنز کے سیشنز ہوں گے۔

پینل ڈسکشنز مختلف سٹیک ہولڈرز کے درمیان بات چیت اور تعاون کو فروغ دینے کے لیے ترتیب دیئے گئے ہیں تاکہ قومی نصاب طلباء اور معاشرے کی بدلتی ضروریات کو پورا کرے۔ نیشنل کریکولم سمٹ 2024 پاکستان کی تعلیمی اصلاحات کے سفر میں ایک اہم سنگ میل ثابت ہو گا، حکومت کا عزم ہے کہ نصاب کو عالمی معیار کے مطابق جدید بنایا جائے گا تاکہ مستقبل میں ایک ہنر مند، تخلیقی اور ذمہ دار شہریوں کی نسل تیار کی جا سکے۔