چیمپئنز ٹرافی : پاک بھارت میچ دبئی میں ہوگا، آئی سی سی کی براڈکاسٹرز کو یقین دہانی

پاکستان کے سرکاری ٹیلی ویژن کے کسی نمائندے نے شرکت نہیں کی

ذیشان مہتاب جمعہ 6 دسمبر 2024 11:46

چیمپئنز ٹرافی : پاک بھارت میچ دبئی میں ہوگا، آئی سی سی کی براڈکاسٹرز ..

لاہور (اردو پوائنٹ تازہ ترین اخبار ۔ 6 دسمبر 2024ء ) انٹرنیشنل کرکٹ کونسل (آئی سی سی) نے براڈکاسٹرز کو پاکستان اور بھارت کے درمیان میچ دبئی میں کروانے کی یقین دہانی کروادی۔

نجی ٹی وی ایکسپریس نیوز کے مطابق آئی سی سی براڈ کاسٹ ورکشاپ کا انعقاد گزشتہ روز دبئی میں ہوا، اس میں پاکستان کے سرکاری ٹیلی ویژن کے کسی نمائندے نے شرکت نہیں کی۔

ذرائع نے بتایا کہ شرکاء کو آئی سی سی حکام نے واضح طور پر بتا دیا کہ چیمپیئنز ٹرافی کا پاک بھارت میچ دبئی میں ہی ہوگا، اس سے قبل ان کی جانب سے تحفظات ظاہر کیے گئے تھے۔

ادھر حیران کن طور پر اب تک ٹورنامنٹ کا شیڈول ہی فائنل نہیں ہوسکا ہے، تاہم امید کی جارہی ہے باضابطہ اعلان کے بعد شیڈول فائنل کرلیا جائے گا۔

(جاری ہے)

گزشتہ روز اس حوالے سے اجلاس ہونا تھا جس میں شرکت کےلیے چیئرمین پی سی بی محسن نقوی بھی دبئی پہنچ چکے تھے لیکن بھارت کو پاکستانی پارٹنر شپ یا فیوژن فارمولے پر تحفظات ہیں اور بعض امور بدستور حل طلب ہیں۔

اس کے تحت آئندہ 3 سال تک دونوں ممالک میں ہونے والے آئی سی سی ایونٹس میں ان کے میچز دبئی میں ہوں گے، امید یہی ہے کہ کوئی مثبت حل سامنے آ جائے گا۔

جمعرات کو آئی سی سی کی کوئی میٹنگ تو نہیں ہوئی البتہ چیئرمین پی سی بی محسن نقوی کی آئی سی سی چیف جے شاہ سے ملاقات کی اطلاعات ہیں، اب ہفتے کو آن لائن بورڈ میٹنگ میں معاملات کو حتمی شکل دی جا سکتی ہے۔ بھارتی میڈیا کا کہنا ہے کہ ووٹنگ کی شاید نوبت ہی نہیں آئے گی، بھارتی ٹیم اپنے تمام میچز یو اے ای میں کھیلے گی، اگر سیمی فائنل اور پھر فائنل کےلیے کوالیفائی کیا تو یہ دونوں میچز بھی دبئی میں ہوں گے، پاکستان بھی بھارت میں منعقدہ ایونٹس میں ایسا ہی فارمولا چاہتا ہے۔