محتسب پنجاب انصاف کا ادارہ سستا اور بروقت انصاف فراہم کرتا ہے ، آگاہی سیمینار سے صوبائی محتسب کے میڈیا ایڈوائزر کا خطاب

لاہور (اُردو پوائنٹ اخبارتازہ ترین - اے پی پی۔ 10 دسمبر2024ء) دفتر صوبائی محتسب پنجاب کی آگاہی مہم کے سلسلہ میں گورنمنٹ اسلامیہ کالج ریلوے روڈ میں ایک سیمینار کا اہتمام کیا گیا جس کی صدارت پرنسپل گورنمنٹ اسلامیہ کالج ریلوے روڈ ڈاکٹر عباد نبیل نے کی۔ صوبائی محتسب کے میڈیا ایڈوائزر عبدالباسط خان نے اس موقع پر خطاب کرتے ہوئے اس ادارے کی افادیت اور تیزی سے انصاف فراہم کرنے کی صلاحیت سے طلبہ کو آگاہ کیا۔

انہوں نے کہا کہ دفتر محتسب پنجاب انصاف کا ادارہ سستا اور بروقت انصاف 45 سے 60 دنوں کے اندر فراہم کرتا ہے جس میں کسی وکیل کی ضرورت نہیں ہوتی اور پورے پنجاب کے تمام اضلاع میں ایڈوائزز ہمہ وقت عوام کی خدمت کیلئے دستیاب ہیں اور اس کی ہیلپ لائن 1050پر24گھنٹے اپنی شکایت درج کروائی جاسکتی ہے۔

(جاری ہے)

اس موقع پر سینئر رجسٹرار صوبائی محتسب شاہد عباس نے شکایت درج کروانے سے متعلق مختلف مراحل سے آگاہ کیا۔

شاہد عباس کا کہنا تھا کہ محتسب پنجاب کسی بھی شکایت پر ازخود نوٹس لے سکتے ہیں۔ مختلف محکموں کی ممکنہ خامیوں کو نہ صرف اجاگر کرتے ہیں بلکہ حکومت پنجاب کو اس سلسلے میں اس پر قابو پانے میں حکمت عملی وضع کرنے میں مدد فراہم کرتے ہیں۔اس موقع پر اسسٹنٹ ڈائریکٹر میڈیا سید سبطِ حیدر اور اسسٹنٹ ڈائریکٹر پی آر عادل اصغر نے پرنسپل ڈاکٹر عباد نبیل کو انکے بہترین ورکنگ سٹائل اور پروگرام کے کامیاب انعقاد پر خراج تحسین پیش کیا۔

پروگرام کے اختتام پر سوال و جواب کا سیشن رکھا گیا اور طلبہ کے سوالات کے جوابات دیئے گئے۔ آخر میں پرنسپل ڈاکٹر عباد نبیل نے میڈیا ایڈوائزر عبدالباسط خان اور سینئر رجسٹرار شاہد عباس کو سونیئر اور پھولوں کا گلدستہ اور تحائف پیش کیے۔ طلبہ نے محتسب پنجاب میڈیا ونگ کا اس آگاہی پروگرام کے انعقاد پر بھرپور شکریہ ادا کیا۔ یہ امر قابل ذکر ہے کہ گورنمنٹ اسلامیہ کالج کا تاریخی ہال اپنی تاریخی اہمیت کے لیے مشہور ہے، جہاں بانی پاکستان قائد اعظم محمد علی جناح 11 مرتبہ خطاب فرما چکے ہیں۔

یہ ہال قومی تاریخ اور عظیم رہنما کی یادوں کا امین ہے، اور اسی اہمیت کے پیش نظر اس مقام پر یہ سیمینار منعقد کیا گیا۔مزید معلومات کے لیے متعلقہ ادارے کی ویب سائٹ یا کالج کے دفتر سے رابطہ کیا جا سکتا ہے۔