دعاہے دنیا میں امن قائم ہو ،ہر انسان کوسکون نصیب ہو‘مریم نواز

فلسطین اور شام کے دربدر مجاہدین انسانیت کیلئے کڑے امتحان کے مترادف ہے، پاکستان نے محدود وسائل کے باوجود کئی دہائیوں تک فراخ دلی سے پناہ گزینوں کی میزبانی کی

جمعہ 20 جون 2025 22:29

دعاہے دنیا میں امن قائم ہو ،ہر انسان کوسکون نصیب ہو‘مریم نواز

لاہور (اُردو پوائنٹ اخبارتازہ ترین - این این آئی۔ 20 جون2025ء)وزیراعلیٰ پنجاب مریم نواز شریف نے پناہ گزین افراد کے عالمی دنWorld Refugee day پر اپنے پیغام میں کہا ہے کہ مہاجر ہونا کوئی جرم نہیں یہ ایک کربناک مجبوری ہے۔ کوئی شوق سے پناہ گزین نہیں بنتا زندگی بچانے کے لئے اپنا آنگن، اپنی مٹی، اپنی چھت چھوڑنا پڑتا ہے۔وزیراعلیٰ مریم نواز شریف نے کہا کہ جنگیں ختم ہو جاتی ہیں مگر مہاجرین کی بے گھری نسلوں تک رہ جاتی ہے۔

(جاری ہے)

فلسطین ا ور شام کے دربدر مہاجرین انسانیت کے لیے ایک کڑے امتحان کے مترادف ہے۔دنیا کو ادراک ہونا چاہیے کہ پناہ مانگنے والا کمزور نہیں، مظلوم ہوتا ہے۔ وزیراعلیٰ مریم نواز شریف نے کہا کہ پاکستان نے محدود وسائل کے باوجود فراخ دلی سے لاکھوں مہاجرین کی با عزت طریقے سے میزبانی کی۔ پاکستان ہمیشہ مظلوموں کی آواز بنا ہے،مہاجرین کی فلاح کے لیے آواز بلند کرتے رہے گے۔ وزیراعلیٰ مریم نواز شریف نے کہا کہ دعا ہے کہ دنیا میں امن قائم ہو، ظلم کا خاتمہ ہو، اور ہر انسان کو سکون نصیب ہو۔