ہم خواب نہیں دیکھتے، انہیں حقیقت میں بدلتے ہیں: سعودی ولی عہد کا فیفا ورلڈ کپ کی میزبانی ملنے پر اظہار خیال

شہزادہ محمد بن سلمان نے دنیا بھر میں فٹبال کے کھیل کو فروغ دینے، محبت، امن اور رواداری کے پیغامات کو پھیلانے کے لیے سعودی عرب کے عزم پر بھی زور دیا

ذیشان مہتاب جمعرات 12 دسمبر 2024 12:12

ہم خواب نہیں دیکھتے، انہیں حقیقت میں بدلتے ہیں: سعودی ولی عہد کا فیفا ..

ریاض (اردو پوائنٹ تازہ ترین اخبار ۔ 12 دسمبر 2024ء ) فٹ بال ورلڈ کپ 2034ء کی میزبانی سعودی عرب کو ملنے کے بعد سعودی ولی عہد شہزادہ محمد بن سلمان نے اپنے خیالات کا اظہار کیا ہے۔

سعودی ولی عہد شہزادہ محمد بن سلمان نے کہا ہے کہ ہم خواب نہیں دیکھ رہے، ہم ایک حقیقت کے بارے میں سوچ رہے ہیں جو سچ ہوگی،شہزادہ محمد بن سلمان نے دنیا بھر میں فٹبال کے کھیل کو فروغ دینے، محبت، امن اور رواداری کے پیغامات کو پھیلانے کے لیے سعودی عرب کے عزم پر بھی زور دیا۔

یاد رہے کہ فٹبال کی عالمی تنظیم فیفا نے کونسل اجلاس میں فٹبال ورلڈ کپ 2034ء کی میزبانی سعودی عرب کو ملنے کی تصدیق کی ہے۔

واضح رہے کہ سعودی عرب قطر کے بعد فٹبال ورلڈ کپ کی میزبانی کرنے والا دوسرا مسلمان ملک بن گیا ہے۔

(جاری ہے)

2034ء میں فٹبال کا سب سے بڑا ٹورنامنٹ سعودی عرب کے 5 شہروں میں منعقد ہوگا، جبکہ 15 مختلف سٹیڈیم ورلڈ کپ فٹ بال کی میزبانی کریں گے۔

فیفا کے جنرل اسمبلی اجلاس میں اس اعلان کو بڑی پذیرائی ملی، ریاض کے تاریخی علاقے درعیہ اور بلیو ارڈ سٹی میں ہزاروں افراد نے اس لمحے کو جشن کی صورت میں منایا۔

فیفا کے صدر نے کہا ہے کہ فٹ بال ہی وہ واحد کھیل ہے جو دنیا کو اکٹھا کرتا ہے، ورلڈ کپ 2034ء دنیا بھر کے لوگوں کے لیے شاندار موقع ہوگا۔

دوسری جانب 2030ء کا فٹ بال ورلڈ کپ 3 براعظموں کے 6 ملکوں میں کھیلا جائے گا۔ عالمی کپ کی میزبانی مراکش، پرتگال اور سپین کو دی گئی ہے۔ ایونٹ کے ابتدائی 3 میچز جنوبی امریکا کے 3 ممالک پیراگوائے، ارجنٹائن اور یوراگوائے میں ہوں گے، جنوبی امریکا میں ہونے والے 3 میچز فٹبال ورلڈ کپ کی صد سالہ تقریبات کا بھی حصہ ہوں گے۔