بی یو ایم ایچ ایس کوئٹہ نے بلوچستان میں نرسنگ کالجز داخلہ ٹیسٹ کا انعقاد کیا

پیر 16 دسمبر 2024 13:31

کوئٹہ (اُردو پوائنٹ اخبارتازہ ترین - اے پی پی۔ 16 دسمبر2024ء) بولان یونیورسٹی آف میڈیکل اینڈ ہیلتھ سائنسز (بی یو ایم ایچ ایس)کوئٹہ نے بلوچستان بھر میں نرسنگ کالجز داخلہ ٹیسٹ (این سی اے ٹی۔2024) کا انعقاد کیا گیا۔ یہ ٹیسٹ ایم ڈی کیٹ کی طرز پر تشکیل دیا گیا ۔ٹیسٹ میں تقریباً 5000 امیدواروں نے شرکت کی، جن میں 2147 خواتین اور 2763 مرد شامل تھے ۔

تمام مراکز میں مرد اور خواتین امیدواروں کے لیے الگ امتحانی ہال مختص کیے گئے تاکہ امتحان منظم اور منصفانہ طور پر منعقد کیا جا سکے۔ٹیسٹ کی نگرانی وزیر تعلیم بلوچستان راحیلہ درانی،وزیراعلیٰ کی تحقیقاتی ٹیم کے رکن طارق الرحمن، ایڈیشنل سیکرٹری گورنر بلوچستان سیکرٹریٹ مجیب الرحمن کاکڑ، ایڈیشنل ڈائریکٹر جنرل ہیلتھ سروسز،بولان میڈیکل کالج کے پرنسپل پروفیسر ڈاکٹر راز محمد کاکڑ، ڈائریکٹر نرسنگ طارق بھٹی، ایگزیکٹو ڈائریکٹر شیخ زید اسپتال اور دیگر نمایاں سٹیک ہولڈرز نے کی۔

(جاری ہے)

امتحان بلوچستان پولیس کے تعاون سے سخت حفاظتی انتظامات کے تحت منعقد کیا گیا۔شفافیت کو یقینی بنانے کے لیے نقل کے 8 کیسز کی نشاندہی کی گئی اور ان کے خلاف کارروائی کی گئی۔بی یو ایم ایچ ایس کے وائس چانسلر پروفیسر ڈاکٹر شبیر احمد لہڑی نے تمام سٹیک ہولڈرز، امتحانی ٹیموں، انتظامی عملے اور قانون نافذ کرنے والے اداروں کا ٹیسٹ کے کامیاب انعقاد پر ان کا شکریہ ادا کیا ۔