محکمہ صحت کا موبائل ایپلی کیشن کے ذریعے پروفیسرز کی حاضری لگانے کا فیصلہ

سروسز ،پنجاب انسٹی ٹیوٹ آف کارڈیالوجی سے عملدرآمدبھی شروع کردیا گیا

پیر 23 دسمبر 2024 17:07

لاہور(اُردو پوائنٹ اخبارتازہ ترین - این این آئی۔ 23 دسمبر2024ء)محکمہ صحت پنجاب نے موبائل ایپلی کیشن کے ذریعے پروفیسرز کی حاضری لگانے کا فیصلہ کیا ہے جبکہ اس فیصلے پر عملدرآمد سروسز اور پنجاب انسٹی ٹیوٹ آف کارڈیالوجی سے شروع کردیا گیا ہے۔بتایا گیا ہے کہ محکمہ صحت پنجاب نے پروفیسرز کی ہسپتالوں میں حاضری کو یقینی بنانے کے لیے یہ اقدام اٹھایا ہے ۔

(جاری ہے)

ایپلیکشن کے مطابق پہلے روز سروسز ہسپتال کے 81 اور پی آئی سی کے 33 فیصد پروفیسرز غیر حاضر رہے جبکہ دوسرے روز سروسز ہسپتال میں 41 فیصد اور پی آئی سی میں 24 فیصد پروفیسرز غیر حاضر پائے گئے۔اس حوالے سے سیکرٹری صحت کا کہنا تھا کہ موبائل ایپلی کیشن حاضری کو صوبہ بھر کے ہسپتالوں تک پھیلانے کے احکامات جاری کردئیے گئے ہیں۔انہوں نے کہا کہ موبائل ایپلی کیشن کی رپورٹ میں پروفیسرز کے حاضری نہ لگانے اور لیٹ آنے والوں کی فہرست بھی مرتب کی گئی ہے۔