منی لانڈرنگ کیس،مونس الٰہی کی دوبارہ گرفتاری کیلئے اقدامات کا حکم

جمعہ 27 دسمبر 2024 13:41

لاہور (اُردو پوائنٹ اخبارتازہ ترین - این این آئی۔ 27 دسمبر2024ء) اسپیشل سینٹرل عدالت نے ایف آئی اے منی لانڈرنگ کے مقدمے میں سابق وفاقی وزیر چودھری مونس الٰہی کی دوبارہ گرفتاری کے لئے اقدامات کرنے کا حکم دے دیا۔لاہور کی سپیشل سینٹرل عدالت کے جج تنویر احمد شیخ نے گزشتہ سماعت کا تحریری حکم نامہ جاری کر دیا۔

(جاری ہے)

تحریری حکم نامے میں کہا گیا ہے کہ پی ٹی آئی رہنما چودھری مونس الٰہی اور شریک ملزم محمد جبران کو بیرون ملک سے گرفتار کرنے کے لئے دوبارہ اقدامات کئے جائیں، آئندہ سماعت پر گرفتاری سے متعلق اقدامات کی رپورٹ پیش کی جائے۔

عدالتی حکم میں کہا گیا کہ جے آئی ٹی کے سربراہ عمرے پر ہونے کے باعث عدالت پیش نہیں ہوئے، پرویز الٰہی نے بریت کی درخواست دائر کی، پرویز الٰہی کی بریت کی درخواست پر نوٹس جاری کرتے فریقین سے دلائل طلب کر لئے ہیں۔سپیشل سینٹرل عدالت نے تحریری حکم میں مزید کہا کہ عدالت کیس کی مزید سماعت 20جنوری کو کرے گی۔