نئے سال میں صفائی کے نظام کو مزید بہتر بنایا جائے گا،سی ای اوراولپنڈی ویسٹ مینجمنٹ کمپنی

راولپنڈی (اُردو پوائنٹ اخبارتازہ ترین - اے پی پی۔ 01 جنوری2025ء) سی ای اوراولپنڈی ویسٹ مینجمنٹ کمپنی رانا ساجد صفدر نے کہا ہے کہ سال 2024 راولپنڈی ویسٹ مینجمنٹ کمپنی کے لیے غیرمعمولی کامیابیوں کا سال رہا،ہماری ٹیم نے ہر موسم اور ہر چیلنج میں بہترین خدمات فراہم کیں اور راولپنڈی کو صفائی کے لحاظ سے ایک مثالی شہر بنانے میں اہم کردار ادا کیا،نئے سال میں ہم صفائی کے معیار کو مزید بلند کریں گے، عوامی شراکت داری کے ذریعے راولپنڈی کو پاکستان کا سب سے صاف ستھرا ڈویژن بنانے کے اپنے مشن کو جاری رکھیں گے۔

ہمارا مقصد صرف صفائی ہی نہیں بلکہ شہریوں کی زندگی کو بہتر بنانا بھی ہے،ایک پیغام میں سی ای او نے ورکرز کو تاکید کی کہ وہ اپنی خدمات کو جذبے اور لگن کے ساتھ جاری رکھیں اور صفائی کے مشن کو کامیابی سے ہمکنار کریں،نئے سال میں صفائی کے نظام کو مزید بہتر، جدید اور پائیدار بنایا جائے گا۔

(جاری ہے)

ستھرا پنجاب پروگرام کے تحت صفائی کے شعبے میں جدید ٹیکنالوجی اور بہترین حکمت عملیوں کا اطلاق کیا جائے گا، تاکہ شہریوں کو صاف ستھرا اور صحت مند ماحول فراہم کیا جا سکے۔

راولپنڈی ویسٹ مینجمنٹ کمپنی نے سال 2024 کے دوران صفائی کے شعبے میں غیرمعمولی کارکردگی کا مظاہرہ کرتے ہوئے شہریوں کو صاف اور صحت مند ماحول فراہم کرنے کے لیے نمایاں کامیابیاں حاصل کیں، وزیر اعلیٰ پنجاب مریم نواز شریف کی ہدایت پر ستھرا پنجاب پروگرام کے تحت پورے راولپنڈی ڈویژن میں صفائی کی معیاری خدمات کی فراہمی کو یقینی بنایا گیاہے،راولپنڈی ویسٹ مینجمنٹ کمپنی نے پورے سال شہریوں کو صفائی کی اہمیت سے آگاہ کرنے کے لیے منظم اور مستقل آگاہی مہم کا انعقاد کیا۔

عیدالاضحیٰ کے موقع پر 9000 ٹن سے زائد آلائشیں بروقت اٹھا کر شہریوں کو صاف ستھرا ماحول فراہم کیا گیا۔ اسی طرح مختلف قومی تہواروں، دنوں، کھیلوں کے مقابلوں اور ملکی و غیر ملکی مہمانوں کی آمد کے دوران خصوصی صفائی آپریشنز انجام دیے گئے۔مری میں برفباری کے دوران کمپنی کے ورکرز نے راستوں اور سڑکوں کو کھلا رکھنے کے لیے نہایت مستعدی سے کام کیا، جبکہ بارشوں کے موسم میں نکاسی آب کو بہتر بنانے کے لیے نالیوں کی صفائی کو یقینی بنایا گیا۔

کمپنی نے شہر میں احتجاج کے باعث راستوں کی بندش،سخت گرمی اور سردی کے موسموں میں بھی اپنے ورکرز کی موجودگی کو یقینی بناتے ہوئے صفائی کے تمام آپریشنز جاری رکھے۔ڈینگی اور سموگ کے خلاف بھی موثر اقدامات کیے گئے، جن میں سڑکوں کی دھلائی، کوڑا کرکٹ کی تلفی، اور ماحول کو صاف رکھنے کے اقدامات شامل تھے۔ لاہور میں ستھرا پنجاب پروگرام کی لانچنگ تقریب اور روڈ شو میں سی ای او رانا ساجد صفدر نے شرکت کی، جہاں وزیر اعلیٰ پنجاب نے راولپنڈی اور مری میں صفائی کے حوالے سے کمپنی کی کاوشوں کو سراہا۔

چیئرمین راولپنڈی ویسٹ مینجمنٹ کمپنی اور ڈپٹی کمشنر راولپنڈی حسن وقار چیمہ نے صفائی آپریشنز کی براہ راست نگرانی کی۔ کمشنر راولپنڈی انجینئر عامر خٹک نے مختلف اوقات میں شہر کے دورے کیے، کنٹرول رومز کا معائنہ کیا، اور صفائی کے اقدامات پر اطمینان کا اظہار کیا۔ ان کی قیادت نے کمپنی کی کارکردگی کو مزید بہتر بنانے میں اہم کردار ادا کیا۔نئے سال کے موقع پر کمپنی نے شہریوں سے اپیل کی ہے کہ وہ صفائی کو اپنی زندگی کا لازمی حصہ بنائیں اور کمپنی کے صفائی کے مشن میں بھرپور ساتھ دیں۔