پنجاب فوڈ اتھارٹی کی کارروائی،5300 لیٹر جعلی کولڈ ڈرنکس تلف

جمعرات 2 جنوری 2025 10:40

لاہور (اُردو پوائنٹ اخبارتازہ ترین - اے پی پی۔ 02 جنوری2025ء) پنجاب فوڈ اتھارٹی کی ٹیموں نے لاہور میں چھاپہ مار کر5300 لیٹر کولڈ ڈرنکس، 2500 لیٹر جوس، 600 لیٹر پیک دودھ اور ایک من سے زائد جعلی اشیا تلف کر دیں۔

(جاری ہے)

ڈی جی پنجاب فوڈ اتھارٹی عاصم جاوید نے جاری بیان میں کہا ہے کہ جعلسازی کا مکروہ کاروبار کرنے پر یونٹ مالک کے خلاف مقدمہ درج کروا دیا گیا ہے ، یونٹ میں مختلف برانڈز کی جعلی اشیا کی تیاری کی جارہی تھی،جعلی اور غیر منظور شدہ فارمولا کولڈ ڈرنکس ، جوس، میٹھا دودھ،مختلف ممنوعہ کیمیکلز اور اجزا کی ملاوٹ سے چیونگم اور سنیکس تیار اور مختلف اشیا کی پیکنگ کی جارہی تھی۔

انہوں نے بتایا کہ یونٹ سے برآمد شدہ تمام زائد المیعاد خام مال ضبط کر لیا گیا ہے۔ ڈی جی فوڈ اتھارٹی نے کہا ہے کہ یونٹ میں صفائی کے ناقص انتظامات تھے،خوراک کا کاروبار بغیر فوڈ اتھارٹی لائسنس چھپ کر کیا جارہا تھا۔ویجیلنس ٹیم کی ریکی کے بعد کارروائی عمل میں لائی گئی ۔ انہوں کہا ہے کہ خوراک کے نام پر جعلی کاروبار کرنے والوں کے خلاف کارروائی کریں گے اور پنجاب بھر سے صحت دشمن عناصر کا ہر حربہ ناکام بنا کر قلع قمع کیا جائے گا۔