عالمی مارکیٹ میں خام تیل کی قیمتوں میں اضافہ ہوگیا

عالمی مارکیٹ میں خام تیل کی قیمت 80 ڈالر فی بیرل سے اوپر چلی گئی، روس اور ایران پر مزید امریکی پابندیوں کے خدشے کے باعث تیل کی قیمتوں میں اضافہ ہوا

ثنااللہ ناگرہ جمعہ 10 جنوری 2025 20:32

اسلام آباد ( اردوپوائنٹ اخبار تازہ ترین۔ آئی پی اے ۔ 10 جنوری 2025ء ) عالمی مارکیٹ میں خام تیل کی قیمتوں میں اضافہ ہوگیا، عالمی مارکیٹ میں خام تیل کی قیمت 80 ڈالر فی بیرل سے اوپر چلی گئی۔ روس اور ایران پر مزید امریکی پابندیوں کے خدشے کے باعث تیل کی قیمتوں میں اضافہ ہوا۔ انگریزی اخبار بزنس ریکارڈر کے مطابق برینٹ کروڈ کے سودے 2.23 ڈالر یعنی 2.9 ڈالر کے اضافے کے ساتھ 79.15 ڈالر فی بیرل تک پہنچ گئے جو کہ تین ماہ کی بلند ترین سطح ہے۔

امریکی ویسٹ ٹیکساس انٹرمیڈیٹ ڈبلیو ٹی آئی کروڈ کے سودے 2.19 ڈالر یعنی 2.96 کے اضافے کے ساتھ 76.11 ڈالر تک پہنچ گئے۔دوسری جانب وفاقی حکومت نے جنوری کے لیے آر ایل این جی کی نئی قیمت مقرر کر دی اور اوگرا نے نئی قیمتوں کا نوٹیفیکیشن بھی جاری کر دیا۔

(جاری ہے)

اوگرا سے جاری نوٹیفکیشن میں کہا گیا ہے کہ سوئی نادرن کے لیے قیمت میں کمی کی گئی ہے جبکہ سوئی سدرن کے لیے قیمت میں اضافہ ہوا ہے اس ضمن میں بتایا گیا ہے کہ سوئی ناردرن کے لیے آر ایل این جی کی قیمت 12.66 ڈالر فی ایم ایم بی ٹی یو اور سوئی سدرن کے لیے آر ایل این جی کی قیمت 12.60 ڈالر فی ایم ایم بی ٹی یو مقرر کردی گئی ہے۔

واضح رہے کہ دسمبر میں سوئی ناردرن کے لیے آر ایل این جی کی قیمت 12.89 ڈالر فی ایم ایم بی ٹی یو اور سوئی سدرن کی قیمت 12.54 ڈالر فی ایم ایم بی ٹی یو تھی۔ مزید برآں پاکستان کی انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔ سٹیٹ بینک آف پاکستان کے مطابق جمعہ کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 03 پیسے کا اضافہ ریکارڈ کیا گیا ہے جس کے بعد اس کی نئی قیمت 278 روپے 57 پیسے ہو گئی ہے۔

انٹربینک مارکیٹ میں سعودی ریال کی قدر 74 روپے 21 پیسے جبکہ بحرینی دینار کی قدر 738 روپے 96 پیسے رہی۔اسی طرح عمانی ریال کی انٹربینک مارکیٹ میں قدر 723 روپے 61 پیسے رہی، کویتی دینار کی قدر 902 روپے 94 پیسے اور قطری ریال کی قدر 76 روپے 42 پیسے ریکارڈ کی گئی۔دوسری جانب اوپن مارکیٹ میں امریکی ڈالر کی قیمت خرید 278 روپے 70 پیسے اور قیمت فروخت 280 روپے 20 پیسے ریکارڈ کی گئی۔