اراضی کی عدم فراہمی، پشاور میں گیٹس فاؤنڈیشن کیساتھ بنیادی صحت مراکز کا منصوبہ ختم ہونے کا خدشہ

پشاور میں اراضی فراہم نہ کی گئی تو منصوبہ ختم ہوجائیگا اور فاؤنڈیشن کی جانب سے مزید فنڈز بھی روک دئیے جائیں گے، ذرائع

اتوار 19 جنوری 2025 17:00

پشاور (اُردو پوائنٹ اخبارتازہ ترین - این این آئی۔ 19 جنوری2025ء)خیبرپختونخوا کے دارالحکومت پشاور میں بل گیٹس فاؤنڈیشن کیساتھ صحت مراکز منصوبہ ختم ہونیکا خدشہ ہے۔ذرائع کے مطابق مارچ تک گیٹس فاونڈیشن کو پشاور میں اراضی فراہم نہ کی گئی تو منصوبہ ختم ہوجائیگا اور فاؤنڈیشن کی جانب سے مزید فنڈز بھی روک دئیے جائیں گے۔ذرائع نے بتایاکہ فاؤنڈیشن نے پولیو کے 55 ہائی رسک ایریاز کیلئے 15 صحت مراکز کی مفت تعمیر کی پیشکش کی ہے اور صحت مراکز کیلئے محکمہ بلدیات نے 4 جگہوں کی نشاندہی بھی کی ہے۔

ذرائع کے مطابق محکمہ بلدیات نے تاحال صحت مراکز کیلئے سائٹس اور این او سی جاری نہیں کی، ان سائٹس پر پولیو قطرے، حفاظتی ٹیکہ جات، ہیلتھ سینٹرز کیلئے عمارتیں تعمیر کرنی ہیں۔ذرائع کے مطابق معاہدے کے تحت اراضی فراہم کرنے پر فاؤنڈیشن سولرائزڈ صحت مراکز تعمیرکریگا۔

(جاری ہے)

ذرائع کے مطابق پشاور میں 15 صحت مراکز 2020 سے گیٹس فاؤنڈیشن کے تعاون سے کرائے کی عمارتوں میں قائم ہیں اور معاہدے کے تحت صحت مراکز کے اخراجات دسمبر 2025 تک گیٹس فاؤنڈیشن برداشت کرے گی۔

ذرائع نے بتایاکہ صحت مراکز کے قیام سے پہلے ہائی رسک یونین کونسلوں میں انسداد پولیو مہم کی کوریج 49 فیصد تھی جو 15 صحت مراکز کے قیام کے بعد 80 فیصد تک بڑھ گئی اس حوالے سے سیکرٹری صحت خیبرپختونخوا عدیل شاہ نے بتایا کہ بی ایچ یوز کیلئے محکمہ بلدیات کو سائٹس اور این او سی فراہم کرنے کی درخواست کی ہے اور کوشش ہے کہ منصوبے پر جلد سے جلد کام مکمل کرلیا جائے۔