صوبائی وزیر زراعت کی زیر صدارت اجلاس، وزیراعلیٰ پنجاب کسان پیکج کے منصوبوں واگیتی کپاس کی کاشت کا جائزہ

لاہور (اُردو پوائنٹ اخبارتازہ ترین - اے پی پی۔ 29 جنوری2025ء) صوبائی وزیر زراعت و لائیو سٹاک سید عاشق حسین کرمانی کی زیر صدارت ایگریکلچر ہائوس لاہور میں اہم اجلاس منعقد ہوا جس میں وزیر اعلیٰ پنجاب کسان پیکج کے اہم منصوبوں اور اگیتی کپاس بارے پیشرفت کا تفصیلی جائزہ لیا گیا ،اس موقع پر سیکرٹری زراعت پنجاب افتخار علی سہو بھی موجود تھے۔ وزیر زراعت و لائیو سٹاک نے کہا کہ وزیر اعلیٰ پنجاب کسان کارڈ کے دائرہ کار کو مزید وسعت دی جائے گی،اب تک 5 لاکھ 32 ہزار کسان کارڈزکے اجرا اورکسان کارڈ کیلئے53.8ارب روپے کی منظوری ہوچکی ہے جس میں سے اب تک34ارب روپے کی خریداری کی جا چکی ہے جن میں 90 فیصد کھادوں کی خریداری کی مد میں خرچ ہوئے ہیں،کسان کارڈ کے ذریعے جنوبی پنجاب کے علاقوں میں زیادہ خریداری ہوئی ہے۔

(جاری ہے)

انہوں نے کہاکہ وزیراعلیٰ پنجاب گرین ٹریکٹر پروگرام کے تحت 9500 قرعہ اندازی میں کامیاب کاشتکاروں میں سے 9008کاشتکاروں نے گرین ٹریکٹرز کیلئے اپنے حصہ کی رقم جمع کرا دی ہے،اب تک8823گرین ٹریکٹرز کی مینوفیکچرنگ ہو چکی جن میں 6415 ٹریکٹرز کاشتکاروں کو فراہم کئے جا چکے ہیں،مارچ کے مہینے میں گرین ٹریکٹر پروگرام فیزIمکمل ہو جائے گا۔اسی طرح وزیر اعلی پنجاب سولرائزیشن آف زرعی ٹیوب ویلز پروگرام کے تحت 5 لاکھ 33 ہزار سے زائد موصول درخواستوں میں سکروٹنی کے بعد3 لاکھ 85ہزار درخواستوں کی منظوری ہو چکی ہے، ان میں سے ڈیزل سے چلنے والے 87 فیصد جبکہ بجلی سے چلنے والے 13 فیصد ٹیوب ویلز کی شمسی توانائی پر منتقلی کیلئے درخواستوں کی وصولی کی گئی ہے، اس پروگرام کے تحت 31 جنوری کو قرعہ اندازی کی جارہی ہے۔

صوبائی وزیر زراعت نے مزید کہا کہ ماڈل ایگریکلچر مالز کے قیام کے سلسلے میں ساہیوال اور ملتان میں گرے سٹرکچر کا70فیصد کام جبکہ سرگودھا اور بہاولپور میں 60 فیصد کام مکمل ہو چکا ہے، وزیر اعلی پنجاب کے زیادہ گندم آگا ئوپروگرام کے تحت 14ہزار9 سو76 درخواستیں لیزرلینڈ لیولرز اور گرین ٹریکٹر کیلئے8 ہزار7 سو28 درخواستیں وصول ہو چکی ہیں، وزیر اعلی پنجاب کے سموگ کنٹرول پروگرام کے تحت 1 ہزار سپر سیڈرز کی فراہمی مکمل ہو چکی ہے جبکہ گزشتہ سال سپرسیڈرز کی مدد سے 1 لاکھ10 ہزار ایکڑ رقبہ پر دھان کی باقیات کو کارآمد بنایا گیا ہے،اس کے علاوہ 7805 کاشتکاروں کو کرایہ پر سپرسیڈرز فراہم کئے گئے ہیں،اس پروگرام کے دوسرے مرحلہ کے دوران اب تک2 ہزار کاشتکاروں کو سپرسیڈرز کی فراہمی کیلئے الاٹمنٹ لیٹرز جاری کر دیئے گئے ہیں،ان میں سے1788 سپر سیڈرز کی بکنگ ہو چکی ہے۔

صوبائی وزیر زراعت نے کہا کہ وزیر اعلی پنجاب کی ہدایات پر صوبہ میں اگیتی کپاس کی ترویج کیلئے پلان پر عملدرآمدجاری ہے،امسال اگیتی کپاس کی کاشت 10 لاکھ ایکڑ رقبہ پر مکمل کی جائے گی تاکہ کپاس کی بھرپور پیداوار حاصل کی جا سکے۔ ملتان میں 3 لاکھ80ہزار ایکڑ، ڈی جی خان2 لاکھ15 ہزار ایکڑ، بہاولپور1 لاکھ50 ہزار ایکڑ جبکہ ساہیوال و فیصل آباد ڈویژن میں بالترتیب1 لاکھ20 ہزار اور سرگودھا ڈویژن میں 15 ہزار ایکڑ پر اگیتی کپاس کی کاشت یقینی بنائی جائے گی،اس سلسلہ میں کاٹن ایکشن پلان پر عملدرآمد جاری اور وزیر اعلی پنجاب کی جانب سے 5ایکڑ پر اگیتی کپاس کاشت کرنے والوں کو 5ہزار روپے فی ایکڑ کے حساب سے سیڈ سپورٹ کا فیصلہ کیا گیا ہے جس کے لیے ٹوٹل 2ارب روپے کی رقم مختص کی گئی ہے،تمام مستفید ہونے والے کاشتکاروں کے لیے کسان کارڈ ہولڈر ہونا لازمی قرار دیا گیا ہے۔

اس موقع پر سیکرٹری زراعت پنجاب نے کہا کہ وزیر اعلی پنجاب کسان پیکج پر ٹائم لائنز کے مطابق عملدرآمد جاری ہے، اگیتی کپاس کی کاشت کے سلسلے میں متعلقہ فیلڈ افسران کو خصوصی ذمہ داریاں تقویص کر دی گئی ہیں،اس ضمن میں 16 فروری سے کپاس کی اگیتی کاشت کے زیادہ اگائو کے سلسلہ میں مہم پورے زرور و شور سے جاری ہے، ڈویژنل اور ڈسٹرکٹ سطح پر فیلڈ فارمیشنز کو ٹاسک سونپ دئیے گئے ہیں۔ اجلاس میں اسپشل سیکرٹری زراعت آغا بنیل اختر، ایڈیشنل سیکرٹری زراعت(پلاننگ) کیپٹن(ر) وقاص رشید،ڈائریکٹر جنرلز زراعت چوہدری عبدالحمید، نوید عصمت کاہلوں اور رانا تجمل سمیت دیگر افسران بھی موجود تھے۔