نیشنل یونیورسٹی آف ماڈرن لینگویجز نے پشاور کیمپس کی نئی عمارت کا افتتاح کر دیا

منگل 4 فروری 2025 14:46

پشاور (اُردو پوائنٹ اخبارتازہ ترین - اے پی پی۔ 04 فروری2025ء) نیشنل یونیورسٹی آف ماڈرن لینگویجز نے پشاور کیمپس کی نئی عمارت کا افتتاح کر دیا، جو خیبر پختونخوا میں معیاری تعلیم کے فروغ کی جانب ایک اہم سنگ میل ثابت ہوگا۔افتتاحی تقریب کے مہمان خصوصی ریکٹر نمل میجر جنرل (ر) شاہد محمود کیانی تھے، جن کے ہمراہ ڈی جی نمل بریگیڈیئر شہزاد منیر، فیکلٹی ممبران، طلبہ اور مقامی کمیونٹی کے افراد بھی موجود تھے۔

ریکٹر نمل نے فیتہ کاٹ کر عمارت کا باضابطہ افتتاح کیا، جس کے بعد دعا کی گئی۔ اس موقع پر قائم مقام ریجنل ڈائریکٹر پشاور کیمپس نے انہیں کیمپس کی سہولیات اور مستقبل کے منصوبوں پر بریفنگ دی۔میڈیا سے گفتگو کرتے ہوئے ریکٹر نمل نے تعلیم کے فروغ میں پشاور کیمپس کی اس نئی عمارت کی اہمیت پر روشنی ڈالی۔

(جاری ہے)

انہوں نے کہا کہ یہ جدید اور کشادہ عمارت نمل کی معیاری تعلیم کے فروغ اور طلبہ کو جدید دور کے تقاضوں کے مطابق تیار کرنے کے عزم کا مظہر ہے۔

ہمارا مقصد خیبر پختونخوا کے طلبہ کو ان کے اپنے شہر میں اعلیٰ تعلیم کے مواقع فراہم کرنا ہے۔انہوں نے مزید بتایا کہ نمل پشاور کیمپس کے فارغ التحصیل طلبہ مختلف شعبوں جیسے کہ حکومتی ادارے، میڈیا، آئی ٹی، تعلیم اور کاروبار میں نمایاں کردار ادا کر رہے ہیں۔ نئی عمارت اس مشن کو مزید مستحکم کرے گی اور خطے میں تعلیمی ترقی میں اہم کردار ادا کرے گی۔

افتتاح کے بعد، ریکٹر نمل نے عمارت کا دورہ کیا ۔ انہوں نے طلبہ سے ملاقات کی اور سوال و جواب کا سیشن بھی منعقد ہوا، جس میں انہوں نے تعلیم کی اہمیت، پیشہ ورانہ مہارت اور ملک کے لیے فخر کا باعث بننے پر زور دیا۔ انہوں نے طلبہ کو یقین دلایا کہ ضم شدہ علاقوں کے طلبہ کے لیے سکالرشپ کے مواقع بڑھانے کے لیے ایچ ای سی سے رابطہ کیا جائے گا۔انہوں نے کہا کہ مستقبل کے منصوبوں کے حوالے سے، نمل پشاور کیمپس میں جدید تحقیقاتی مراکز کے قیام، نئے تعلیمی پروگراموں کے آغاز، اور صنعت کے ساتھ روابط مضبوط کرنے کا ارادہ رکھتے ہیں۔

Facebook Twitter Google + Share on Whatsapp

نیشنل یونیورسٹی آف ماڈرن لینگویجز نے پشاور کیمپس کی نئی عمارت کا افتتاح کر دیا

متعلقہ عنوان :

مزید تعلیم کی خبریں