سلیکشن کمیٹی چیمپئنز ٹرافی اسکواڈ کو ری ویو کر رہی ہے

سلیکشن کمیٹی کو اختیار ہے وہ چیمپئنز ٹرافی کے قومی اسکواڈ میں تبدیلی کرتے ہیں یا نہیں، محسن نقوی

جمعہ 7 فروری 2025 20:01

سلیکشن کمیٹی چیمپئنز ٹرافی اسکواڈ کو ری ویو کر رہی ہے

لاہور (اُردو پوائنٹ اخبارتازہ ترین - این این آئی۔ 07 فروری2025ء) چیئرمین پاکستان کرکٹ بورڈ محسن نقوی نے انکشاف کیا ہے کہ سلیکشن کمیٹی چیمپئنز ٹرافی اسکواڈ کو ری ویو کررہی ہے۔لاہور قذافی اسٹیڈیم میں غیر رسمی گفتگو کے دوران محسن نقوی نے کہا کہ سلیکشن کمیٹی کو اختیار ہے وہ چیمپئنز ٹرافی کے قومی اسکواڈ میں تبدیلی کرتے ہیں یا نہیں۔سلیکشن کمیٹی چیمپئنز ٹرافی کا اسکواڈ ری ویو کر رہے ہیں، خوشدل شاہ اور فہیم اشرف کو نیک نیتی سے اسکواڈ کا حصہ بنایا گیا۔

چیئرمین پی سی بی نے مزید کہا کہ دبئی کے لئے ویزے کا مسئلہ حل ہوگیا ہے، جس کے پاس میچ کا کارڈ یا ٹکٹ ہوگا اسے ویزا مل جائے گا۔محسن نقوی نے کہا کہ دبئی جانے کے حوالے سے چارٹرڈ فلائٹس کے لیے پی آئی اے سے بات کریں گے۔

(جاری ہے)

ان کا کہنا تھا کہ 16فروری کو چیمپئنز ٹرافی کی تقریب آئی سی سی کی آفیشل تقریب ہے، جس میں مختلف ممالک کے لوگوں کو مدعو کیا گیا ہے۔

محسن نقوی نے کہا کہ آئی سی سی کے ساتھ چیمپئنز ٹرافی کے میچ پاسز کی ڈیل طے پائی ہے، آئی سی سی سے طے شدہ رقم لیں گے۔انہوں نے کہا کہ قذافی اسٹیڈیم کے نئے فائیو اسٹار ہوٹل کی تعمیر اگلے ایک سال میں مکمل کریں گے، نیشنل کرکٹ اکیڈمی کو نئے طریقے سے ڈیزائن کریں گے۔چیئرمین پی سی بی نے کہا کہ این سی اے کے ٹریننگ گراونڈ کی توسیع کریں گے، وی آئی پی باکسز کو 6 سال کے لئے کرائے پر دیں گے۔

ہر باکس کی قیمت 10کروڑ روپے رکھی جائے گی، 24باکسز میں سے کچھ سیریز ٹو سیریز رینٹ کریں گے اور باقی کچھ مدت کے لئے کرائے پر دیں گے۔انہوں نے کہا کہ 16فروری کو چیمپیئنز ٹرافی کی تقریب آئی سی سی کی آفیشل تقریب ہے جس میں مختلف ممالک کے لوگوں کو مدعو کیا گیا ہے۔چیئرمین پی سی بی نے وفاقی دارالحکومت اسلام آباد میں نیا اسٹیڈیم بنانے کا اعلان کرتے ہوئے کہا کہ اسلام آباد کے پر فضا مقام پر نیا اسٹیڈیم بنے گا۔انہوں نے کہا کہ نیشنل کرکٹ اکیڈمی کو نئے طریقے سے ڈیزائن کریں گے اور چیمپیئنز ٹرافی کے بعد نیشنل کرکٹ اکیڈمی کی بلڈنگ کو گرا کر نئے انداز سے بنائیں گے۔ قبل ازیں، چیئرمین پی سی بی نے اجلاس میں قومی کھلاڑیوں کی سلیکشن پر مشاورت بھی کی۔