تحریک انصاف کی رہنماء زرتاج گل کے وارنٹ گرفتاری جاری

پی ٹی آئی کی رکن قومی اسمبلی کے وارنٹ گرفتاری سول جج مبشر حسن چشتی کی جانب سے جاری کیے گئے

ساجد علی بدھ 12 فروری 2025 11:15

اسلام آباد ( اُردو پوائنٹ اخبارتازہ ترین۔ 12 فروری 2025ء ) پاکستان تحریک انصاف کی رہنماء زرتاج گل کے وارنٹ گرفتاری جاری کردیئے گئے۔ تفصیلات کے مطابق زرتاج گل کے خلاف تھانہ بارہ کہو میں مقدمہ درج ہے جس میں ڈسٹرکٹ اینڈ سیشن کورٹس اسلام آباد نے پاکستان تحریک انصاف کی رہنما زرتاج گل کے وارنٹ گرفتاری جاری کیے، پی ٹی آئی رہنماء کے وارنٹ گرفتاری سول جج مبشر حسن چشتی کی جانب سے جاری کیے گئے، فیصلے میں عدالت نے کہا کہ زرتاج گل متعدد بار طلبی کے باوجود پیش نہیں ہوئیں، زرتاج گل کے پیش نہ ہونے پر وارنٹ گرفتاری جاری کیے جارہے ہیں۔

علاوہ ازیں سنگجانی جلسے پر درج مقدمات میں انسداد دہشتگردی عدالت نے عمر ایوب اور زرتاج گل کی ضمانتوں میں توسیع کردی، پی ٹی آئی قیادت کے خلاف سنگجانی جلسے پر درج مقدمات کے معاملے میں عمر ایوب اور زرتاج گل کی ضمانت قبل از گرفتاری کی درخواست پر سماعت انسداد دہشت گردی عدالت اسلام آباد میں ہوئی، جس میں عدالت نے ملزمان کی عبوری ضمانتوں میں 6 مارچ تک توسیع کردی۔

(جاری ہے)

بتایا جارہا ہے کہ انسداد دہشتگری عدالت نمبر ایک کے جج ابوالحسنات محمد ذوالقرنین نے درخواستوں پر سماعت کی، جس میں ملزمان کی ضمانت قبل از گرفتاری کی درخواستوں پر دلائل پیر کو بھی نہیں ہو سکے، دوران سماعت سردار محمد مصروف خان ایڈووکیٹ، آمنہ علی ایڈووکیٹ و دیگر عدالت میں پیش ہوئے، بعد ازاں ضمانت قبل از گرفتاری کی درخواستوں پر سماعت 6 مارچ تک ملتوی کردی گئی۔

میڈیا سے گفتگو کرتے ہوئے زرتاج گل کا کہنا تھا کہ موجودہ حکومت نے نہ عدلیہ کو چھوڑا نہ ہی صحافیوں کو چھوڑا ہے، یہ سیاسی ورکرز کو تو ویسے ہی دہشتگرد بنا کر پیش کرتے ہیں، مسلم لیگ ن کی حکومت سے آئین، صوبے اور نہ ہی کوئی سیاسی جماعت محفوظ ہے، آخر میں عدلیہ رہ گئی تھی، افسوس کی بات ہے 26ویں آئینی ترمیم کے بعد سپریم کورٹ، ججز اور تمام بنچز کو متنازعہ کردیا گیا، مسلم لیگ ن نے ملک کو کس نہج پر پہنچادیا ہے۔