ژ*ویلنٹائن ڈے عریانی، فحاشی اور بے حیائی کی ایک یلغار ہی: ڈاکٹر اشرف جلالی

جمعرات 13 فروری 2025 21:40

لاہور (اُردو پوائنٹ اخبارتازہ ترین - آن لائن۔ 13 فروری2025ء) تحریک لبیک یارسول اللہ صلی اللہ علیک و سلم کے سربراہ اور تحریک صراط مستقیم کے بانی ڈاکٹر محمد اشرف آصف جلالی نے کچھ لوگوں کی طرف سے 14 فروری کو ’’ویلنٹائن ڈے‘‘ منانے پر اپنے ردِّ عمل کا اظہار کرتے ہوئے کہا کہ ویلنٹائن ڈے عریانی، فحاشی اور بے حیائی کی ایک یلغار ہے۔ مخربِ اخلاق ہونے کی وجہ سے اس پر پابندی لگائی جائے۔

اسلام میں غیر مسلموں کے تہوار منانے یا ان میں شرکت کی ہر گز کوئی گنجائش نہیں ہے۔ اسلام دشمن قوتوں نے مسلم معاشرے سے اخلاقی اور روحانی اقدار کو تباہ کرنے کے لیے ویلنٹائنز ڈے جیسے منصوبے لانچ کیے ہیں۔ جس سوسائٹی میں نفسانی خواہشات اور شہوات کے لیے حدود و قیود نہ ہوں، وہاں شیطان پوری طرح مسلط ہو جاتا ہے۔

(جاری ہے)

جس معاشرے میں رشتہ ازدواج اور نکاح مسنون کے بغیر مرد و زن کے تعلقات استوار ہو جائیں، وہ آتش فشاں بن جاتا ہے۔

ویلنٹائن ڈے اور بسنت جیسے تہوار مسلم معاشرے پر بدی کی یلغار ہیں۔ ذرائع ابلاغ کے ذریعے شرم و حیاء اور حجاب شرعی کے تقاضوں کو اجاگر کیا جائے۔ ان دونوں تہواروں کے غیر اسلامی ہونے کے ساتھ ساتھ اس میں اور بھی بہت سی قباحتیں اور خرابیاں موجود ہیں۔ اسلام فحاشی کے ہر کام اور فحاشی کا باعث بننے والے ہر عمل سے سختی سے منع کرتا ہے۔ نوجوان لڑکے اور لڑکیوں کے درمیان غیر شرعی رابطے بالآخر قتل و غارت کا باعث بنتے ہیں۔

معاشرے میں فلم بینی کا رجحان، کمپیوٹر اور انٹرنیٹ کے غلط استعمال اور حیاء سوز پروگراموں اور مارننگ شوز کی وجہ سے چھوٹے چھوٹے بچوں اور بچیوں سے زیادتی اور ظلم و بربریت روزمرہ کا معمول بن چکا ہے۔ بے حیائی پھیلانے والے چینلز اور اخبارات کو بھاری جرمانے کیے جائیں۔