جماعت اسلامی کی لاڑکانہ میں دو ہندو نوجوانوںکو ڈکیتی کے دوران مزاحمت پر زخمی کرنے کے واقعے کی مذمت

کراچی(اُردو پوائنٹ اخبارتازہ ترین - این این آئی۔ 14 فروری2025ء)جماعت اسلامی سندھ کے امیر کاشف سعید شیخ نے لاڑکانہ شہر میں امن و امان کی بدترین صورتحال پر افسوس کا اظہار کرتے ہوئے کہا ہے کہ لاڑکانہ شہر میں روز بروز چوری،ڈکیتی اور اغوا کی بڑھتی ہوئی وارداتوں نے عوام کی زندگی اجیرن کردی ہے، لاڑکانہ شہر کے تاجر اور ہندو برداری جرائم پیشہ افراد کے ٹارگٹ پر ہے، امن و امان کی بگڑتی ہوئی صورتحال کا اندازہ اس بات سے لگایا جا سکتا ہے کہ 13 فروری کو ایک دن کے اندر دو افسوسناک واقعات میں مارکیٹ تھانے کی حد سے مشہور تاجر نینومل کے پوتے رونق سے ڈکیتی کے دوران دوران مزاحمت پر گولیاں چلاکر زخمی کردیا گیاجبکہ دوسری جانب کریانہ کی دکان پر سنجے کمار کو بھی گولیاں مار کر شدید زخمی کردیا گیا ۔

(جاری ہے)

لاڑکانہ شہر میں ایسی صورتحال کبھی نہیں دیکھی گئی، لوگوں کی جان، مال اور عزت آبرو محفوظ نہیں ہے ۔ان خیالات کا اظہار انہوں نے لاڑکانہ ٹراما سینٹر میں زخمی ہونے والے دو ہندو نوجوانوں کی عیادت، ورثاء سے ملاقات کے بعد صحافیوں سے بات چیت کے دوران کیا۔ اس موقع پر ضلعی امیر ایڈوکیٹ نادر علی کوسو، مقامی امیر رمیز راجہ شیخ سمیت دیگر رہنما بھی ان کے ساتھ موجود تھے۔

صوبائی امیر نے مزید کہا کہ لاڑکانہ میں ہر روز تاجروں اور عام شہریوں سے چوری کی وارداتیں معمول بن چکی ہیں، لیکن پولیس،قانون نافذ کرنے والے ادارے اور سندھ حکومت خاموش تماشائی بنے ہوئے ہیں۔ لاڑکانہ شہر میں ایک دن میں 2 ہندو تاجروں کو ڈکیتی کے دوران گولی مار کر زخمی کیا گیا، لیکن اب تک کوئی عوامی نمائندہ حال پوچھنے بھی نہیں آیا، کشمورکندھ کوٹ کے بعد لاڑکانہ ضلع بھی ابڈ جرائم پیشہ عناصر کیلئے جنت اور پرامن شہریوں کیلئے جہنم بنادیا گیا ہے۔

تجارت سے تعلق رکھنے والے ہندو برداری کے لوگ امن و امان کی بدترین صورتحال کے پیش نظر یہاں سے ہجرت کرنے پر مجبور ہیں۔ جماعت اسلامی سندھ میں امن امان کی مخدوش صورتحال کے پیش نظر اتوار 16فروری کو شکارپور میں عوامی دھرنا دے رہی ہے عوام اگر ڈاکو راج سے نجات چاہتے ہیں تو ہمارا ساتھ دے اور دھرنے میں بھرپور شرکت کرے۔ کاشف سعید شیخ نے وفاق اور سندھ حکومت سے پرزور مطالبہ کیا ہے کہ لاڑکانہ شہر میں امن و امان کی صورتحال کو بہتر بنانے اور مجرموں کو سزا دینے کے لیے سخت اور سنجیدہ اقدامات کیئے جائیں تاکہ عدم تحفظ کے شکار عوام سکھ کا سانس لے سکیں۔