پاکستان کی ترقی میں چین اپنا کردار ادا کر رہا ہے ، چائنیز قونصل جنرل ژائو شیریں

بدھ 19 فروری 2025 23:09

لاہور(اُردو پوائنٹ اخبارتازہ ترین - آن لائن۔ 19 فروری2025ء) چائنیز قونصل جنرل ژائو شیریں نے کہا ہے کہ پاکستان کی ترقی میں چین اپنا کردار ادا کر رہا ہے اور آئندہ بھی کرتا رہے گا۔وہ پنجاب یونیورسٹی وائس چانسلر آفس کے کمیٹی روم میں چین کے نئے سال کے سلسلے میںکیک کاٹنے کی تقریب سے خطاب کررہے تھے۔ اس موقع پر وائس چانسلر پنجاب یونیورسٹی پروفیسرڈاکٹر محمد علی، چیف ایگزیکٹو آفیسر اورنج لائن ڑین زدونگ ، پرو وائس چانسلر ڈاکٹر خالد محمود، ڈائریکٹر کنفیوشش انسٹیٹیوٹ ڈاکٹر ثوبیہ خرم، پنجاب یونیورسٹی چائنیز اساتذہ اورطلباء نے شرکت کی۔

(جاری ہے)

تقریب میں چائینیز قونصل جنرل ژائوشیریں اور وائس چانسلر پروفیسر ڈاکٹر محمد علی نے نئے سال کی تقریبات کا کیک کاٹا۔اپنے خطاب میں ژائو شیریں نے کہاکہ پاکستانی عوام کی محبت کا تہہ دل سے شکریہ ادا کرتے ہیں ۔ انہوں نے کہا کہ امید ہے کہ نیا سال ہمارے لئے زیادہ خوشحالی لائے گا۔ پروفیسر ڈاکٹر محمد علی نے نئے سال پر چائینیز قوم کو مبارکباد پیش کرتے ہوئے کہا کہ چین پاکستان کا آزمودہ دوست ہے۔ انہو ں نے کہا کہ پاکستانی اور چینی عوام ایک دوسرے سے جڑے ہوئے ہیں۔ انہوں نے کہا کہ پاکستان میں چینی زبان کے فروغ میں کردار ادا کر رہے ہیں۔