سعودی عرب ، سینما گھروں میں 52 فلموں کا 110 ملین ریال کا بزنس

پیر 24 فروری 2025 08:50

ریاض (اُردو پوائنٹ اخبارتازہ ترین - اے پی پی۔ 24 فروری2025ء) سعودی عرب کے سینما گھروں میں 52 فلموں نے 110 ملین ریال کا بزنس کیا ہے۔ سعودی فلم اتھارٹی کا کہنا ہے کہ رواں برس کے ابتدائی 45 دنوں میں مملکت کے سینما گھروں میں لگنے والی 52 فلموں نے 110 ملین ریال کا بزنس کیا۔الاقتصادیہ کے مطابق فلم اتھارٹی کی جانب سے جاری رپورٹ میں کہا گیا کہ گزشتہ برس کے آخری مہینوں نے سینما گھروں کی آمدنی 40 سے 50 ملین ریال سے زیادہ نہیں تھی، سب سے زیادہ آمدنی دسمبر 2024 میں ریکارڈ کی گئی جو 55 ملین ریال تھی۔

(جاری ہے)

اعداد وشمار کے مطابق چار فلموں کی مجموعی آمدنی 52 فیصد رہی جن میں سعودی فلم ’ھوبال‘ سرفہرست رہی جس نے 23 ملین ریال کا بزنس کیا اور 5 لاکھ 47 ہزار لوگوں نے یہ فلم دیکھی۔ توقع ہے یہ فلم 5 بہترین فلموں میں سے ایک ہو گی۔دوسرے نمبر پر دو مصری فلمیں رہی جنہوں نے رواں برس 20 ملین ریال کا بزنس کیا اور جبکہ ورلڈ ڈزنی کی فلم نے 10 ملین ریال کمائے۔گزشتہ برس سنیما گھروں کی آمدنی میں اضافے کی وجہ ٹکٹوں کی قیمت کی کمی تھی جس کے بعد لوگوں نے سینما کا رخ کیا۔ٹکٹوں میں 10 سے 35 فیصد تک کمی کی گئی تھی جو ٹکٹ 50 ریال کا تھا وہ 35 ریال کا کر دیا گیا جبکہ 85 ریال والے کی قیمت کم کرکے 55 ریال کردی گئی تھی۔