تمام ماڈل و ریلیف بازاروں میں اشیائے خوردونوش کی فراہمی اور قیمتوں کو مانیٹر کیا جارہا ہے‘ سلمی بٹ

24 گھنٹوں میں ماڈل بازاروں ،سہولت سٹالز سے 5 لاکھ 60 ہزار سے زائد افراد نے خریداری کی‘ معاون خصوصی پرائس کنٹرول

پیر 3 مارچ 2025 14:13

لاہور(اُردو پوائنٹ اخبارتازہ ترین - این این آئی۔ 03 مارچ2025ء) معاون خصوصی برائے پرائس کنٹرول سلمی بٹ نے کہاہے کہ گزشتہ 24 گھنٹوں میں ماڈل بازاروں اور سہولت سٹالز سے 5 لاکھ 60 ہزار سے زائد افراد نے خریداری کی، لاہور ڈویژن میں 3 لاکھ 11 ہزار سے زائد افراد نے سہولت سٹالز سے مختلف اشیا ء کی خریداری کی۔انہوںنے کہا کہ گوجرانولہ ڈویژن میں 1لاکھ 61 ہزار، گجرات اور راولپنڈی 42 ہزار500، سرگودھا میں 18 ہزارسے زائد افراد نے اشیائے خورونوش خریدیں، ملتان، ساہیوال، بہاولپور،ڈی جی خان اور فیصل آباد میں 82 ہزار سے زائد افراد نے سہولت سٹالز سے خریداری کی، تمام اضلاع میں عوام نی2 لاکھ 97 ہزار کلوگرام سے زائد فروٹس اور سبزیوں کی خریداری کی۔

معاون خصوصی برائے پرائس کنٹرول سلمی بٹ کے مطابق 18700 کلو چکن،14 ہزار 215کلوگرام کھجور،23 ہزار کلو سے زائد بیسن کی خریداری کی گئی ۔

(جاری ہے)

انہوں نے کہا کہ چینی کے سٹالز کی شکایات بارے فوری ازالہ کیلئے متعلقہ ڈپٹی کمشنرز کو ہدایات جاری کر دی گئی ہیں، پیر کے روز سٹالز پر چینی فراہم کر دی گئی ہے ۔ وزیر اعلی پنجاب مریم نواز کی ہدایت پر اشیا ء کے معیار میں مزید بہتری کی گئی ہے، تمام ماڈل و ریلیف بازاروں میں اشیائے خوردونوش کی فراہمی اور قیمتوں کو مانیٹر کیا جارہا ہے، کسی صورت جعلسازی اور دھوکہ دہی کی اجازت نہیں دی جائے گی۔ انہوںنے کہا کہ غیر معیاری اور جعلی اشیا ء کی فروخت کرنے والوں کے خلاف پنجاب فوڈ اتھارٹی کو خصوصی ہدایات جاری کی جاچکی ہیں۔