میانمار میں 500سے زائد پاکستانیوں کو جبری قید میں رکھے جانے کا انکشاف

قید سے 11پاکستانیوں نے فرار کی کوشش کی ،6بچ نکلنے ،باقی 5لاپتہ کا کچھ پتہ نہیں چل رہا،پاکستانی ہائی کمشنر حکومت میانمار میں پھنسے پاکستانیوں کی واپسی یقینی بنائے گی،دپٹی چیئرمین سینیٹ سیدال خان ناصر

پیر 3 مارچ 2025 22:35

اسلام آباد(اُردو پوائنٹ اخبارتازہ ترین - این این آئی۔ 03 مارچ2025ء)میانمار میں 500سے زائد پاکستانیوں کو جبری قید میں رکھے جانے کا انکشاف ہوا ہے۔میانمار میں جبری قید میں درجنوں پاکستانی خواتین بھی شامل ہیں۔رپورٹ کے مطابق بیگار کیمپوں میں پاکستانیوں پر تشدد بھی کیا جانے لگا اور ان سے زبردستی غیر قانونی مالی جرائم بھی کروائے جا رہے ہیں۔

(جاری ہے)

تھائی لینڈ میں پاکستانی ہائی کمشنر رخسانہ افضال نے بتایاکہ قید سے 11پاکستانیوں نے فرار کی کوشش کی جن میں 6بچ نکلنے میں کامیاب ہوگئے جنہیں پاکستان بھجوادیا جبکہ باقی 5لاپتہ ہیں اور ان کا کچھ پتہ نہیں چل رہا۔

انہوں نے کہاکہ ہمارے نوجوانوں کو سوشل میڈیا کے ذریعے اچھی ملازمتوں کا جھانسہ دیکر بینکاک بلاتے ہیں اور نوجوان ایجنٹس کو پیسہ دیکر یہاں پہنچتے ہیں تو انہیں میانمار بھیج دیتے ہیں۔انہوںنے کہاکہ میانمار میں اسکیم کمپاؤنڈ ہیں جب ایک بار وہ پھنس جاتے ہیں وہاں سے نکالنے کیلئے کوئی طریقہ نہیں ہوتا۔دوسری جانب ڈپٹی چیئرمین سینیٹ سیدال خان ناصر نے کہا ہے کہ حکومت میانمار میں پھنسے پاکستانیوں کی واپسی یقینی بنائے گی۔