ملالہ یوسفزئی کی 13 سال بعد سوات میں آبائی گھر آمد

ہیلی کاپٹر کے ذریعے اپنے گاؤں پہنچیں، والد ضیاء الدین یوسفزئی اور والدہ بھی ہمراہ تھیں

ساجد علی جمعرات 6 مارچ 2025 15:25

سوات ( اُردو پوائنٹ اخبارتازہ ترین۔ 06 مارچ 2025ء ) نوبیل انعام یافتہ ملالہ یوسفزئی نے 13 سال بعد ضلع سوات میں اپنے آبائی علاقے شانگلہ کا دورہ کیا اس دوران وہ اپنے آبائی گھر بھی گئیں اور ان کی رشتہ داروں سے بھی ملاقاتیں ہوئی۔ میڈیا رپورٹس کے مطابق ملالہ یوسفزئی ہیلی کاپٹر کے ذریعے ایک روزہ دورے پر اپنے گاؤں برکانہ شاہ پور پہنچیں تو ان کے والد ضیاءالدین یوسفزئی اور والدہ بھی ہمراہ تھیں، ملالہ یوسفزئی اپنے آبائی گھر گئیں اور رشتہ داروں سے بھی ملاقات کی جہاں انہوں نے یتیم بچیوں کے لیے تعمیر کیے گئے ملالہ یوسف زئی سکول کا دورہ بھی کیا۔

یاد رہے کہ نوبیل امن انعام یافتہ ملالہ یوسف زئی کو 2012 میں طالبان کی فائرنگ سے زخمی ہونے کے بعد بیرون ملک منتقل کر دیا گیا تھا، انہوں نے رواں برس جنوری میں پاکستان میں لڑکیوں کی تعلیم سے متعلق اسلام آباد میں ہونے والے سربراہی اجلاس میں بھی شرکت کی تھی جہاں خطاب کرتے ہوئے ان کا کہنا تھا کہ نبی کریم ﷺ پر نازل ہونے والی پہلی وحی ہمیں یاد دلاتی ہے کہ سیکھنا اسلام کی بنیاد ہے، یہ تمام مردوں، عورتوں، لڑکوں اور لڑکیوں کے لیے پیغام ہے کہ وہ لکھنے، پڑھنے اور سیکھنے کے ذریعے ترقی اور بااختیار ہونے کی کوشش کریں لیکن دنیا میں 12 کروڑ اور پاکستان میں سوا کروڑ لڑکیاں سکول نہیں جاتیں، اسرائیل نے غزہ میں پورا نظام تعلیم تباہ کردیا، طالبان خواتین کو انسان نہیں سمجھتے، طالبان نے ایک دہائی سے تعلیم کا حق چھین رکھا ہے۔

(جاری ہے)

انہوں نے کہا کہ فلسطین کے بچوں نے اپنی زندگی اور اپنا مستقبل کھودیا، غزہ میں اسرائیل نے اسکولوں کو تباہ کردیا ہے، غزہ میں 90 فیصد یونیورسٹیاں بھی تباہ ہوچکی ہیں، ایک فلسطینی لڑکی اپنا مستقبل نہیں بنا سکتی اگر وہ سکول نہیں جاسکتیں، اسرائیل کی عالمی قوانین کی خلاف ورزی پرآوازبلند کرتی رہوں گی، مسلم ورلڈ لیگ کا شکریہ جنہوں نے ہمیں یہاں اکھٹا کیا، پاکستان سے میں نے اپنا سفر شروع کیا تھا اور میرا دل ہمیشہ پاکستان میں رہتا ہے۔