اداکارہ رانیا را کی بنگلورو کے بین الاقوامی ائیرپورٹ پر گرفتاری نے انڈسٹری میں ہلچل مچا دی

ہفتہ 8 مارچ 2025 12:01

ممبئی(اُردو پوائنٹ اخبارتازہ ترین - این این آئی۔ 08 مارچ2025ء)جنوبی بھارتی فلم انڈسٹری کی اداکارہ رانیا را کی 3مارچ کو بنگلورو کے بین الاقوامی ائیرپورٹ پر گرفتاری نے انڈسٹری میں ہلچل مچا دی ہے۔بھارتی میڈیا رپورٹ کے مطابق رانیا را 12.86کروڑ بھارتی روپے کی مالیت کا 14.2کلو گرام سونا سمگل کرتے ہوئے پکڑی گئی تھی۔ ڈائریکٹوریٹ آف ریونیو انٹیلی جنس کے حکام کو اداکارہ کی دبئی سے آمد کے بارے میں لیڈ مل چکی تھی اور انہوں نے فوری کارروائی کرتے ہوئے رانیا کو ائیر پورٹ پر ہی روک لیا۔

اداکارہ کا جسمانی معائنہ کرنے پر انہیں ٹیپ اور پٹیوں کا استعمال کرتے ہوئے اس کی رانوں پر بندھی 14سونے کی اینٹیں ملیں، یہ طریقہ وہ مبینہ طور پر کسٹم چیک سے بچنے کیلئے استعمال کرتی تھی۔پہلے یہ بتایا گیا تھا کہ سونا رانیا را نے اپنی جیکٹ میں چھپا رکھا تھا تاہم ڈی آر آئی نے تصدیق کی کہ ممنوعہ مواد (گولڈ بارز)براہ راست اداکارہ کے جسم پر پایا گیا تھا۔

(جاری ہے)

یہ بات سامنے آنے کے بعد اس کیس نے ایک دلچسپ موڑ لیا ہے کہ 33سالہ اداکارہ کرناٹک میں ایک سینئر ڈی جی پی رینک کے آئی پی ایس افسر کی سوتیلی بیٹی بھی ہے جس نے سمگلنگ نیٹ ورک میں ممکنہ اعلیٰ سطحی روابط کے بارے میں سوالات کھڑے کردئیے ہیں۔بھارتی میڈیا کے مطابق حکام اب اس بات کی تحقیقات کر رہے ہیں کہ آیا رانیا را کسی بڑے نیٹ ورک کے لیے کام کر رہی تھی یا اس کام میں ذاتی طور پر ملوث تھی۔واضح رہے کہ متعلقہ حکام سمگل شدہ سونے اور اس کے مطلوبہ وصول کنندگان کے پیچھے نیٹ ورک کی گہرائی سے تحقیقات کر رہے ہیں۔